Kimanin Mutum 500 Ne Suka Amfana Da Tallafi A Garko, Kwamishinan Ƙasa Ya Yaba wa Gwamnan Kano kan Ayyukan Ci Gaba‎

Kimanin mutum 500 ne suka ci gajiyar wani shirin tallafi da Kwamishinan Ƙasa da Tsara Birane na Jihar Kano, Abduljabbar Muhammad Umar, ya ƙaddamar a Ƙaramar Hukumar Garko.

Shirin ya haɗa da rabon babura 100 da kuma tallafin kuɗi ga matasa, shugabannin gundumomi da wasu jiga-jigan siyasa daga mazabu 10 na ƙaramar hukumar, da nufin tallafa wa rayuwar jama’a da bunƙasa tattalin arziƙin yankin.

An Gurbata Harkar Tsaro Da Siyasa A Najeriya  — Lawal Daura

Da yake jawabi a wajen taron, Abduljabbar Muhammad Umar ya yaba wa Gwamnan Jihar Kano, Abba Kabir Yusuf, bisa ayyukan raya ƙasa da gwamnatinsa ke aiwatarwa a faɗin ƙananan hukumomi 44 na jihar.

A cewarsa, ayyukan da suka shafi gyaran hanyoyi, inganta asibitoci, samar da ruwan sha da bunƙasa kasuwanni na taimakawa wajen inganta rayuwar al’umma, musamman a yankunan karkara.

Kwamishinan ya ce shirin tallafin wani ɓangare ne na ƙoƙarinsa na taimaka wa al’ummar Garko tare da tallafa wa manufofin gwamnatin jihar.

A nasa ɓangaren, wakilin Gwamnan Kano, Hamza Buhari Bakwana, ya ce gwamnatin jihar za ta ci gaba da goyon bayan ayyukan raya ƙasa tare da haɗin gwiwa da sauran matakan gwamnati.