’Yan Siyasa Daga Jam’iyyu Daban-Daban Na Goyon Bayan Wa’adin Mulki Na Biyu Ga Shugaba Tinubu — Kwankwaso 

Daga Muhammad Kabir, Kano

Wani mamba a Majalisar Yaƙin Neman Zaɓen Shugaban Ƙasa  na Jam’iyyar APC, Dakta Musa Illiyasu Kwankwaso, ya ce halartar wasu ’yan siyasa daga jam’iyyun adawa wajen ƙaddamar da majalisar yaƙin neman zaɓen na nuna cewa Shugaba Bola Ahmed Tinubu na samun goyon baya daga ɓangarori daban-daban na siyasar Najeriya.

Kwankwaso, wanda shi ne Daraktan Kuɗi na Hukumar Raya Kogin Hadejia-Jama’are, ya bayyana hakan ne yayin da yake tsokaci kan bikin ƙaddamar da majalisar da aka gudanar ranar Laraba.

Power Bank Ya Tilasta Jirgin Saman IndiGo Saukar Gaggawa

Ya ce kasancewar ’yan siyasa daga jam’iyyu daban-daban, ciki har da APGA da Labour Party, a wajen taron na nuna goyon bayansu ga ci gaban mulkin Shugaba Tinubu.

A cewarsa, jawaban wasu shugabanni, ciki har da Gwamnan Jihar Anambra, Chukwuma Charles Soludo, sun nuna muhimmancin fahimtar manufofin tattalin arzikin gwamnatin Shugaba Tinubu da ƙalubalen tattalin arzikin duniya.

Kwankwaso ya ce abin da ya fi jan hankalinsa shi ne yadda mutanen da ba sa ra’ayi ɗaya a siyasance suka amince su haɗa kai wajen tallafa wa Shugaba Tinubu.

Ya ƙara da cewa batun ba wai sake zaɓen shugaban ƙasar kawai ba ne, illa kuma makomar tattalin arzikin Najeriya da ƙoƙarin ganin ƙasar ta samu ci gaba.

Siyasar Kano

Game da siyasar Kano, Kwankwaso ya ce yana sa ran za a samu irin haɗin kan da yake gani a matakin ƙasa a jihar da sauran sassan Najeriya.

Ya kuma yi iƙirarin cewa yadda Shugaba Tinubu ya nuna girmamawa ga Gwamnan Kano, Abba Kabir Yusuf, tare da ba shi hula, na iya zama wata alama ta kyakkyawar alaƙar siyasa tsakaninsu.

Kwankwaso ya ambaci wasu manyan ’yan siyasar Kano, ciki har da Mataimakin Shugaban Majalisar Dattawa, Barau Jibrin; Shugaban Kwamitin Kasafin Kuɗi na Majalisar Wakilai, Abubakar Kabir Bichi; Alhassan Ado Doguwa; Abdulmumin Jibrin Kofa; Sanata Kawu Sumaila; Sanata Ibrahim Shekarau; Alhassan Rirum da tsohon Shugaban APC na ƙasa, Abdullahi Umar Ganduje.

Ya ce a ganinsa, waɗannan ’yan siyasa suna aiki domin tabbatar da nasarar wa’adin mulki na biyu ga Tinubu, da kuma Gwamna Abba Kabir Yusuf tare da mataimakinsa, Murtala Sule Garo.

Dakta Kwankwaso ya kuma bayyana kwarin gwiwarsa cewa za su iya tattara goyon bayan masu zaɓe a Arewacin Najeriya domin sake zaɓen Tinubu.

Sai dai har yanzu waɗannan kalamai ra’ayin Dakta Musa Illiyasu Kwankwaso ne, kuma ba su tabbatar da cewa dukkan jam’iyyun adawa ko ’yan siyasar da ya ambata sun amince da wannan matsaya ba.