2027: Ƙungiyar Da Hannu Na Ta Nemi Gwamnan Bauchi Bala Mohammed Ya Goyi Bayan Shugaba Tinubu

Wata ƙungiyar wayar da kan jama’a kan siyasa mai suna Da Hannu Na, ƙarƙashin dandalin Arewa for Asiwaju, ta isa Jihar Bauchi domin neman Gwamna Bala Mohammed ya goyi bayan Shugaba Bola Ahmed Tinubu a zaɓen 2027.

Ƙungiyar ta kuma bayyana shirinta na biyan tarar wasu fursunoni sama da 150 da kuma raba musu kyaututtuka a wani shirin tallafin jin ƙai.

Cutar Mashaƙo Ta Yi Ajalin Yara Biyar ‘Yan Gida Daya Cikin Mako Guda A Kano

Shugaban ƙungiyar, Jamilu Jadda Garko, ne ke jagorantar tawagar, wadda ya ce ziyarar na da nufin samar da hanyar tattaunawa tsakanin Gwamna Bala Mohammed da Shugaba Tinubu gabanin babban zaɓen 2027.

A cewar ƙungiyar, tana son ƙarfafa fahimtar juna da haɗin gwiwa tsakanin shugabannin biyu, tare da gano abubuwan da za su iya haɗa kai a kai a siyasance.

A yayin ziyarar, ƙungiyar ta kuma ce za ta gana da malaman addinin Musulunci da malaman makarantun Tsangaya domin tattauna batutuwan da suka shafi ilimin addini da ci gaban al’umma.

Dangane da shirin tallafa wa fursunonin, ƙungiyar ta ce tana shirin biyan tarar waɗanda suka cancanci samun ’yanci, inda ta kiyasta cewa shirin zai shafi fiye da mutum 150 da ke da shari’o’in farar hula.

Sai dai ba ta bayyana jimillar kuɗin da za a kashe wajen biyan tarar ba, ko kuma cikakkun bayanai kan shari’o’in da za a duba.

A fannin siyasa, Da Hannu Na ta ce ziyarar Bauchi wani ɓangare ne na ƙoƙarinta na tuntuɓar masu ruwa da tsaki da gina alaƙa tsakanin jam’iyyu daban-daban yayin da shirye-shiryen zaɓen 2027 ke ƙara ƙamari.

Ƙungiyar ta bayyana fatan cewa tattaunawar za ta taimaka wajen samar da fahimtar juna tsakanin Gwamna Bala Mohammed da Shugaba Tinubu.

Sai dai har yanzu ba a bayyana matsayin gwamnan kan wannan yunƙuri ba, kuma babu wata sanarwa a hukumance da ta tabbatar da cewa ya amince zai goyi bayan Tinubu.

Baya ga harkokin siyasa, ƙungiyar ta ce tana gudanar da ayyukan wayar da kan jama’a ta fuskar addini a jihohi 13, tare da haɗin gwiwar kusan makarantun Islamiyya da Tsangaya 300.

Ta ce shirye-shiryen sun haɗa da addu’o’i ga Shugaba Tinubu da Najeriya, musamman kan zaman lafiya, tsaro, haɗin kan ƙasa da ci gaba.

Ko wannan yunƙuri zai sa Gwamna Bala Mohammed ya goyi bayan Tinubu a zaɓen 2027, sai abin da lokaci zai tabbatar. Haka kuma, sakin duk wani fursuna zai dogara ne da cancantarsa da bin ƙa’idojin doka.