Kungiyar NDWG Ta Nuna Goyon Baya Kan Naɗin Murtala Garo A Matsayin Mataimakin Gwamnan Kano

Ƙungiyar Nigerian Democratic Working Group (NDWG) ta bayyana goyon bayanta ga naɗin Hon. Murtala Sule Garo a matsayin wanda aka zaɓa domin zama Mataimakin Gwamnan Jihar Kano, tana mai cewa matakin ya dace da ƙarfafa shugabanci da bunƙasa dimokuraɗiyya.

A cikin wata sanarwa da mai kula da ayyukan ƙungiyar a matakin ƙasa, Mohammed Hussaini, ya fitar a ranar Laraba, ƙungiyar ta yaba wa Gwamnan Kano, Alhaji Abba Kabir Yusuf, bisa matakin da ta ce ya nuna tunani mai zurfi da kuma ƙoƙarin inganta tsarin shugabanci.

RIKICIN AMURKA DA IRAN: Tsadar fetur Ta Tilastawa Direbobi A Kano Ajiye motoci

NDWG ta ce naɗin ya nuna muhimmancin bai wa ƙwararru masu gogewa dama a muƙaman jagoranci domin inganta tafiyar da gwamnati da kuma aiwatar da manufofi masu tasiri ga al’umma.

Sanarwar ta bayyana cewa Murtala Sule Garo na da ƙwarewa a harkokin mulki da siyasa, abin da zai taimaka wa gwamna wajen cika manufofin ci gaban jihar.

Ƙungiyar ta kuma yi kira ga masu ruwa da tsaki na siyasa, ciki har da ‘yan jam’iyyun daban-daban, da su mara wa naɗin baya domin tabbatar da haɗin kai da zaman lafiya a jihar.

Hakazalika, ta jaddada muhimmancin haɗin gwiwa tsakanin ‘yan siyasa, tana mai cewa nasarar shugabanci mai ɗorewa na buƙatar haɗin kai da fifita muradun jama’a gaba da banbancin jam’iyya.

A ƙarshe, NDWG ta ce za ta ci gaba da goyon bayan manufofi da shirye-shiryen da za su inganta shugabanci da hidimar jama’a a Jihar Kano, tare da bayyana kwarin gwiwar cewa naɗin zai taimaka wajen cimma burin ci gaba na dogon lokaci.