Jarumin Barkwanci Rajpal Yadav Ya Dawo Bakin Aiki Bayan Fitowa Daga Kurkuku Saboda Bashi

Fitaccen jarumin barkwanci a fina-finan Indiya, Rajpal Yadav, ya sake komawa harkar shirya fina-finai bayan fitowarsa daga gidan yari sakamakon takaddamar bashin da ta dauki tsawon lokaci ana shari’a a kai.

‎Jarumin mai shekaru 53 ya shafe kusan shekaru goma yana fama da rikicin shari’a kan bashin da ya kai kimanin Rs biliyan 9, lamarin da ya janyo masa tsarewa na wani lokaci. Sai dai bayan samun ‘yanci, ya koma bakin aiki domin ci gaba da harkokin fim dinsa.

Dakarun Soji Sun Hallaka ‘Yanta’adda 25 A Borno

‎Rahotanni sun ce ya riga ya fara daukar sabon fim dinsa mai taken Welcome to the Jungle, wanda ake sa ran zai sake mayar da shi cikin jerin manyan jaruman barkwanci da ke ci gaba da haskakawa a masana’antar fina-finan Indiya.

‎A cewar masu shirya fina-finai, jarumin na shirin gudanar da taron manema labarai a birnin Mumbai a ranar 28 ga watan Fabrairu, inda zai bayyana godiyarsa ga magoya baya da abokan aikinsa da suka tsaya masa a lokacin da yake fuskantar matsin lamba da tsarewa.

‎Ana kuma sa ran Rajpal Yadav zai yi amfani da wannan sabon mataki domin shirin cika shekaru 30 da fara fitowa a masana’antar fina-finai nan da shekarar 2027 — wani gagarumin mataki da ke nuna juriya da dawowarsa da karfi bayan kalubalen rayuwa.

‎Masu sharhi a masana’antar fina-finai na ganin cewa dawowarsa na iya kara farfado da salon barkwanci na gargajiya da ya shahara da shi tsawon shekaru, musamman a fina-finan nishadi da suka dade suna jan hankalin masu kallo.