Jami’an Ƴansanda Sun Kama Wani Sufeton Bogi  ‎

Rundunar ‘Yan Sandan Jihar Akwa Ibom ta kama wani mutum mai suna Precious Joseph bisa zargin sanya kansa a matsayin Sufeton ‘Yan Sanda domin yaudarar jama’a.

Kakakin rundunar, DSP Timfon John, ya ce an kama shi ne a ranar 5 ga Yulin 2026 yayin wani aikin sintiri da binciken ababen hawa da jami’an ‘yan sanda ke gudanarwa a kan titin Atiku Abubakar Way da ke Uyo.

Gwamnatin Kano Ta Kama Gurɓatattun Kayan Abinci Da Abin Sha Na Sama Da Naira Miliyan 300

A cewar rundunar, wanda ake zargin ya tsaya kan cewa shi Sufeton ‘Yan Sanda ne bayan an tare babur ɗinsa da ba shi da lambar rajista. Sai dai lokacin da aka nemi ya gabatar da shaidarsa, ya fito da katin aiki mai ɗauke da sunan wani jami’i, lamarin da ya sa jami’an suka fara zargin cewa ba gaskiya yake faɗa ba.

Binciken da aka yi ya kai jami’an gidan wanda ake zargin da ke Ikot Ekpene, inda aka gano kayayyaki da dama da suka haɗa da hular ‘yan sanda, tambarin rundunar, alamar muƙamin Sufeto, kayan PMF, rigar soji mai launin ɓoye, gashin lauya, takalman hamada guda biyu da sauran kayan jami’an tsaro da ake zargin yana amfani da su wajen kwaikwayon jami’an tsaro.

Rundunar ta ce ana ci gaba da tsare wanda ake zargin domin zurfafa bincike, gano yadda ya samu kayayyakin da aka kwato, ko yana da wasu abokan hulɗa, da kuma tantance ko yana da hannu a wasu laifuka da aka aikata a cikin ko wajen Jihar Akwa Ibom.

Kwamishinan ‘Yan Sandan Jihar Akwa Ibom, Baba Azare, ya tabbatar da cewa rundunar za ta ci gaba da murƙushe masu amfani da sunan jami’an tsaro wajen aikata laifuka. Haka kuma ya gargaɗi jama’a da su guji mallaka ko amfani da kayan jami’an tsaro ba bisa ƙa’ida ba, yana mai cewa doka za ta hukunta duk wanda aka kama da irin wannan laifi.

DAILY POST