Ilimi Da Addini: Iqra’a Academy Nguru Ta Shirya Bikin Yaye Dalibai Da Masu Haddar Alƙur’ani

‎Makarantar Iqra’a Academy for Science and Islamic Education, da ke Nguru a Jihar Yobe, ta shirya gudanar da bikin yaye dalibai karo na biyu tare da bikin kammala haddar Alƙur’ani, a ranar Lahadi, 23 ga Agusta, 2026.

‎Bikin, wanda zai gudana a Kadawa Daki 9, Nguru, zai ƙunshi karrama ɗaliban da suka kammala matakan karatunsu da kuma waɗanda suka yi nasarar haddace Alƙur’ani.

‎FBI Ta Ce Ba Za Ta Iya Sakin Wasu Bayanan Binciken Shugaba Tinubu Ba

‎A cewar sanarwar da mahukuntan makarantar suka fitar, za a fara bikin yaye daliban bangaren ilimi da ƙarfe 9:00 na safe zuwa 12:30 na rana.

‎Daliban da za a yaye sun haɗa da waɗanda suka kammala SS3, JSS3, Primary 5 da Nursery 3.

‎Haka kuma, bikin kammala haddar Alƙur’ani zai gudana daga ƙarfe 3:00 na rana zuwa 6:00 na yamma, inda za a karrama ɗaliban da suka kammala haddar Alƙur’ani.

‎Mahukuntan makarantar sun ce bikin zai kasance wata dama ta nuna irin nasarorin da ɗalibai suka samu a fannonin ilimi, haddar Alƙur’ani, tarbiyya da kyawawan ɗabi’u.

‎Sun kuma bayyana cewa makarantar na ƙoƙarin haɗa ilimin kimiyya da na addinin Musulunci domin samar da ɗaliban da za su iya bayar da gudunmawa mai ma’ana ga al’umma.

‎Makarantar ta gayyaci iyaye, malamai, ’yan uwa da sauran al’umma domin halartar bikin da kuma taya ɗaliban da suka kammala karatu da haddar Alƙur’ani murna.

‎Ta ce kasancewar baƙi a wajen bikin zai ƙara masa armashi da daraja, tare da ƙarfafa gwiwar ɗaliban wajen ci gaba da neman ilimi da aiki da abin da suka koya.