Idan Kana Azumi Kada Ka Rasa Waɗannan Abubuwa 11  – Sheikh Daurawa

DAGA YASIR SANI ABDULLAHI 

Fitaccen Malamin Addinin Musulunci, Sheikh Aminu Ibrahim Daurawa, ya zayyana wasu muhimman abubuwan da ya kamata mai azumi ya lazimta a watan Ramadan.

Yayin da al’ummar Musulmi ke gudanar da ibadar azumi, Sheikh Daurawa ya bayyana cewa akwai ɗimbin lada ga duk wanda ya aiwatar da waɗannan ayyuka kamar yanda Jaridar AMINIYA ta ruwaito

1. Azumi

Ya kamata mai azumi ya kula da azuminsa, ya san hukunce-hukuncensa, ya kiyaye su, tare da nisantar duk wani abu da zai rage lada ko karya azumi.

2. Sallah

A dage da yin sallolin farilla a cikin jam’i, tare da Sallar Taraweeh da Tahajjud, domin samun lada mai yawa.

3. Ciyarwa

Ciyar da mai azumi yana da lada mai girma, ko da dabino ko ruwan sanyi ne. Sheikh Daurawa ya ambato hadisin Annabi (SAW) da ke cewa: “Duk wanda ya ciyar da mai azumi, zai samu lada kamar ya yi azumin.”

4. Umrah

Ga wanda yake da hali, yin Umrah a watan Ramadan yana da lada mai girma. Idan ba shi da hali, ya maye gurbinsa da ciyar da masu azumi.

5. I’tiƙafi

Yin I’tiƙafi na daga cikin manyan ibadu, musamman a kwanaki goma na ƙarshe na Ramadan, domin nesantar shagalin duniya da kuma tsayawa domin ibada.

6. Daren Lailatul Ƙadar

Sheikh Daurawa ya shawarci Musulmi da su dage da neman dacewa da daren Lailatul Ƙadar ta hanyar yin salloli, addu’o’i da sauran ayyukan alheri.

7. Yafiya

Yafiya na daga cikin halayen da Allah ke so. Sheikh Daurawa ya bukaci Musulmi da su yafe wa juna domin neman gafarar Allah a cikin wannan wata mai alfarma.

8. Karatun Al-Ƙur’ani

Yawaita karatun Al-Ƙur’ani yana da lada mai yawa, domin a watan Ramadan aka saukar da shi.

9. Addu’a

Yana da muhimmanci a dage da addu’a, musamman a lokacin Sahur, buɗa-baki da lokacin da ake cikin azumi, domin a waɗannan lokuta Allah na karɓar addu’o’i.

10. Zumunci

Sada zumunta yana ƙara albarka, arziƙi da zaman lafiya.

11. Tausayi

Azumi yana koyar da tausayi da taimakon marasa hali, domin mai azumi yana jin halin da masu buƙata ke ciki, hakan zai sa ya ƙara taimako da jin ƙansu.