Muhuyi Magaji ya maka Ganduje da majalisar dokoki da Kwamishinan Ƴan Sanda a kotu

Daga kabiru basiru fulatan

Dakataccen Shugaban Hukumar Ƙorafe-ƙorafe da Yaƙi da Cin-hanci hanci da Rashawa ta Jihar Kano, Muhuyi Magaji Rimin-Gado ya shigar da ƙara a gaban kotun masana’antu ta ƙasa da ke Abuja, ya na ƙalubalantar tsige shi da gwamnatin Gwamna Abdullahi Umar Ganduje ta yi.

A karar da Magaji ya shigar, gwamnatin Jihar Kano ce ta farko da a ke tuhuma, sai Antoni-Janar na jihar, Majalisar Dokokin Jihar Kano da Akanta-Janar na Jihar Kano, da Barista Mahmud Balarabe da kuma Kwamishinan Ƴanan Sandan Jihar Kano a matsayin waɗanda a ke tuhuma na 2, 3, 4, 5 da 6, bi da bi.

A ƙarar, Rimin-Gado na roƙon kotu da ta tantance ko ta yi duba da sashe na 8,15(i),(g), & (h), dokar Hukumar Ƙorafe-ƙorafe da Yaƙi da Cin-hanci hanci da Rashawa ta Jihar Kano ta 2008 (wacce a ka yi wa kwaskwarima), 36(1) na kundin tsarin mulki Nijeriya 1999 (wanda a ka yi wa kwaskwarima).

Ya nemi kotun da ta tantance ko wanda ake kara na 1 zai iya sa wanda ake kara na 3 ya tantance koken wanda ake kara na hudu ta hanyar dakatar da wanda ake kara daga matsayinsa na shugaban hukumar kare kararrakin jama’a da yaki da cin hanci da rashawa ta jihar Kano, neman hakkin mai da’awar na sauraron adalci.

Rimin-Gado, ta bakin lauyoyinsa, karkashin jagorancin Muhammad Ibrahim Tola, ya kuma bukaci kotun masana’antu ta kasa da ta tantance “Ko ta hanyar sashe na 4 (a), 5, da 6 na dokar hukumar korafe-korafen jama’a da yaki da cin hanci da rashawa ta 2008 (Kamar yadda aka gyara).

Wanda ake kara na 5 ya na da hurumin ci gaba da gabatar da kansa a matsayin shugaban riko na Hukumar korafe-korafen jama’a da yaki da cin hanci da rashawa ta Jihar Kano, bayan wa’adin watanni 1 ya dakatar da wanda ake tuhuma da wanda ake tuhuma na 1.

Ya roki kotun da ta bayar da sanarwar wanda ake kara na 3 ba shi da damar tantance koken wanda ake kara na 4 ta hanyar dakatar da wanda ake kara ba tare da ya fara jin ta bakin wanda ake kara ba ta hanyar da ya dace na kare kansa.

Majalisar dokokin jihar Kano ta dakatar da Magaji a matsayin shugaban hukumar korafe-korafen jama’a da yaki da cin hanci da rashawa ta jihar a ranar 5 ga watan Yuli, 2021 kan kin karbar wani jami’i mai mataki na 4 da aka tura ofishin sa.

Daga baya majalisar ta ba da shawarar a kore shi daga aiki, a kama shi nan take tare da gurfanar da shi a gaban kuliya bisa zarginsa da amfani da jabun takardu.

Sai dai kuma, bayan kusan watanni 7, batun dakatarwar ta Rimin-Gado ya zama kamar an shuka dusa a majalisar.