Cigaban MAAUN Akai-Akai Ya Sauya Matakin Jami’o’i Masu Zaman Kansu A Najeriya

Rahoton AD Scientific Index 2026 ya sake ɗaukaka martabar Maryam Abacha American University of Nigeria (MAAUN), jami’a mai tasowa da ke Kano, wacce ta nuna bajinta a fagen bincike da ingantaccen tsarin koyarwa.

Duk da cewa an kafa MAAUN a shekarar 2021, cikin shekaru uku kacal ta yi wani abin koyi: ta zama ta biyu cikin jami’o’in masu zaman kansu a Najeriya, tare da samun matsayi na 416 a duniya. Wannan nasara ta jawo hankalin masana ilimi da dama, waɗanda ke kiran MAAUN sabuwar tauraruwa mai haskaka fagen bincike da kirkire-kirkire a Najeriya.

Rukunin jami’o’i na MAAUN ta ƙulla yarjejeniyar koyar da Turanci, musayar ɗalibai da Kwalejin Seneca a Canada

Masana ilimi sun bayyana matukar farin ciki da wannan ci gaba, inda suka jaddada cewa tasirin masana bakwai na jami’ar, waɗanda ke cikin kashi 10 cikin 100 na manyan masana kimiyya a duniya, shi ne ginshiƙin da ke hura wa MAAUN wutar gasa da sahun gaba.

Wani masani daga Kano ya ce:”MAAUN ta fitar da kanta; ta nuna cewa sabuwar jami’a ma na iya taka rawar gani idan aka gina ta da tsari, hangen nesa da niyyar inganta ilimi.”

Haka nan, kungiyoyin matasa da na cigaban ilimi sun aika da sakon jinjina, suna mai cewa irin wannan nasara na nuna cewa Arewacin Najeriya na samun ci gaba a fannin ilimi idan aka ba da dama da kulawa.

Rahoton ya bayyana cewa MAAUN na kara zage damtse wajen inganta dakunan bincike na zamani, jawo malamai da masu bincike daga kasashen waje, da kuma samar da tsarin karatu mai daidaito da na jami’o’in duniya.

Wannan ci gaba ya sanya MAAUN zama ɗaya daga cikin muhimman cibiyoyin da ke canza salon ilimi a Arewa, musamman a Kano, inda take dawo da martabar ilimin boko a yankin.

A ƙarshe, MAAUN ta zama abin koyi ga sauran sabbin jami’o’i a Najeriya. Idan aka ci gaba da zuba jari a fannin bincike da kimiyya kamar yadda jami’ar ke yi, akwai yiwuwar Najeriya ta samar da sabuwar fitila a duniyar ilimi.