Boko Haram sun kai hari sansanin sojoji a Kaduna

Daga kabiru basiru fulatan

Ƴan ta’addan Boko Haram sun kai hari a wani sansanin soji da ke unguwar Polewire a Birnin Gwari, Jihar Kaduna, inda su ka kashe sojoji 11 tare da jikkata wasu 19.

Hakazalika wasu ƴan kungiyar ‘yan banga uku ma sun rasa rayukansu, yayin da wasu biyu suka samu raunuka yayin harin.

Daily Nigerian Hausa ta jiyo cewa a yakin da aka kwashi tsawon sa’o’i 3 da rabi, wanda aka fara da karfe 4:30 na yamma kuma aka kare da karfe 8 na dare, an kona wasu manyan tankokin yaƙi guda uku bayan sun kori sojoji daga wajen.

Majiyoyin tsaro sun ce wurin shi ne babbar hanyar zirga-zirgar ‘yan ta’addar da ke tsallakawa daga Naija zuwa Zamfara.

A cikin rahoton lamarin, wanda wakilinmu ya gani, kayan aikin sojan da aka rasa ko aka lalata sun hada da 1 Legion MRAP; 1 Cobra APC; 1 Styer APC; bindigar injin DSHK; 2 HK 21 bindigogi; 1 GPMG; da bindigogi 14 ƙirar AK47 ; bindigogi masu sarrafa kansu 3; Babura 10, da sauransu.

Ko da yake daga baya an ƙaro sojoji daga sansanin ‘yan gudun hijira da ke Gwaska da karfe 9:15 na dare, amma babu tabbacin adadin wadanda suka mutu daga bangaren ‘yan ta’addan.