APC na Fuskantar Babban Kalubale a Adamawa Yayin da Abdulrahman Haske ke Shirin Komawa APM

Jam’iyyar All Progressives Congress (APC) a Jihar Adamawa na fuskantar wani babban koma-baya na siyasa, yayin da fitaccen dan kasuwa kuma mai neman tikitin takarar gwamna, Abdulrahman Bashir Haske, ke shirin ficewa daga jam’iyyar zuwa Allied Peoples Movement (APM) gabanin babban zaben shekarar 2027.

Wani makusancin Haske a harkokin siyasa, Alhaji Hussaini Ahmadu Har, ya tabbatar da cewa shirin mayar da tsarin siyasar Haske daga APC zuwa APM ya kai wani mataki mai nisa.

Gwamnan Kano Ya Taya Abdulmumin Jibrin Kofa Murnar Cika Shekaru 50

Har ya bayyana sauya sheƙar da ake sa ran Haske zai yi a matsayin “girgizar siyasa”, wadda za ta iya sauya yanayin siyasar Jihar Adamawa baki daya. Ya kuma bayyana cewa tuni wasu daga cikin masu biyayya ga Haske suka fice daga APC zuwa APM.

A wani sako da ya wallafa a shafinsa na Facebook da aka tabbatar, Har ya sanya hoton Haske tare da tambarin APM, inda ya ce:

“Wannan tafiya fafatawa ce har zuwa karshe. Kada a bar ku a baya a jirgin nasara. Ku dawo hayyacin ku, ku shiga wannan tafiya.”

Ya kara da cewa:“Abdulrahman Haske yana zuwa a 2027, kuma da yardar Allah zai yi nasara.”

An dauki Haske a matsayin daya daga cikin manyan masu neman tikitin takarar gwamna na APC a Adamawa, inda magoya bayansa ke ganin cewa yana da damar samun tikitin jam’iyyar idan aka gudanar da zaben fidda gwani cikin adalci da gaskiya.

Sai dai bangaren Haske na ganin cewa wasu tsare-tsaren cikin gida na jam’iyyar sun yi amfani da dabaru wajen hana shi shiga gasar.

Idan Haske ya fice daga APC, hakan zai zama babban rashi ga jam’iyyar, musamman ganin irin farin jinin da yake da shi, dimbin magoya baya da kuma ingantaccen tsarin siyasa da ya kafa a matakai daban-daban na jihar.

Ko da yake rahotanni sun nuna cewa Haske ba ya Jihar Adamawa a halin yanzu, ana ci gaba da samun karuwar yanayin da ke nuna cewa sauya shekar tasa na dab da faruwa.

Majiyoyi sun ce komawarsa APM na iya haifar da wata babbar guguwar sauya sheƙa daga APC, African Democratic Congress (ADC), Labour Party (LP) da sauran jam’iyyun siyasa.

Magoya bayan Haske sun dage cewa wasu manyan masu fada a ji ne suka matsa masa lamba har ya bar APC, saboda fargabar da suke da ita kan yadda tasirinsa da burinsa na siyasa ke kara karfi.

Ana sa ran samun karin bayani yayin da tuntubar juna da tattaunawa kan matakin da zai dauka ke ci gaba.