YAU TAKE RANAR YAKI DA ZAZZABIN CIZON SAURO TA DUNIYA: Rashin Tsabtace Muhalli Ne Ke Ƙara Yawaitar Malaria A Kano ‎

‎Babban Jami’in lafiya a matakin farko na Jihar Kano, Nasiru Abdulhamid, ya bayyana cewa rashin tsaftar muhalli na taka muhimmiyar rawa wajen ƙara yawaitar cutar zazzabin cizon sauro (Malaria) a jihar.

‎Ya bayyana hakan ne yayin wata tattaunawa da jaridar INDA RANKA, inda ya jaddada cewa matsalar na ƙara tsananta musamman a yankunan da ake fama da taruwar shara da ruwa mara gudana.

‎Masana kiwon lafiya sun ce cutar Malaria na yaɗuwa ne ta hanyar cizon sauro nau’in Anopheles, wanda ke hayayyafa a wuraren da ruwa ke tsayawa, kamar kwantena da aka zubar, magudanan ruwa da suka toshe, da kuma tarkacen da aka bari a cikin unguwanni.

‎Sun ƙara da cewa rashin kula da tsaftar muhalli, musamman a lokacin damina, na taimakawa wajen yawaitar sauro, abin da ke ƙara haɗarin kamuwa da cutar a tsakanin al’umma.

‎Rahotanni daga World Health Organization sun nuna cewa Malaria na daga cikin manyan cututtukan da ke haddasa mace-mace a nahiyar Afirka, inda yara ƙanana da mata masu juna biyu ke cikin waɗanda suka fi fuskantar barazana.

‎Hukumomin lafiya sun jaddada cewa tsaftace muhalli, zubar da shara yadda ya kamata, da kauce wa barin ruwa ya taru na daga cikin hanyoyin da za su taimaka wajen rage yaɗuwar cutar.

‎Haka kuma, sun shawarci al’umma da su riƙa amfani da gidajen sauro masu ɗauke da maganin kashe ƙwari, tare da gaggauta zuwa asibiti da zarar an fara jin alamun cutar.

‎A wani ɓangare kuma, an ware ranar 25 ga watan Afrilu a matsayin ranar faɗakar da duniya kan cutar Malaria, domin wayar da kai kan illolinta da kuma hanyoyin rigakafi, musamman a ƙasashe masu tasowa.

‎A Najeriya, an ɗauki matakai daban-daban da suka haɗa da rage farashin magungunan Malaria da kuma rarraba gidajen sauro masu ɗauke da magunguna a cibiyoyin lafiya domin kare al’umma daga kamuwa da cutar.