An Gudanar Da Sallah Idi A Sakkwato

A jihar Sakkwato da ke arewacin Najeriya, Wani malamin addinin Musulunci mazaunin Sakkwato, Sheikh Musa Lukuwa, ya jagoranci mabiyansa wajen gudanar da Sallar Idi a ranar Alhamis, sabanin umarnin Sarkin Musulmi, Sa’ad Abubakar III, wanda ya ayyana ranar Juma’a a matsayin ranar karamar Sallah.

Rahotanni sun ce Sheikh Lukuwa ya gudanar da sallar Idi mai raka’a biyu a masallacinsa da ke unguwar Mabera da misalin karfe 9:10 na safe, bayan ya gabatar da jawabi ga mabiyansa kan batun ganin jinjirin watan Shawwal.

Tun da farko, Sarkin Musulmi ya sanar da cewa ba a samu ganin jinjirin watan Shawwal a ko’ina cikin Najeriya ba, matakin da ke tabbatar da ci gaba da azumin Ramadan har zuwa kwanaki 30 kafin gudanar da Sallah.

Sai dai Sheikh Lukuwa ya bayyana cewa ya dogara ne da rahotannin da ya ce an tabbatar na ganin jinjirin wata a Jamhuriyar Nijar.

“Jamhuriyar Nijar tana kusa da mu sosai—kimanin kilomita 100 ne tsakaninmu,” in ji shi. “Idan muna karɓar rahotanni daga birane kamar Kano ko ma Legas, waɗanda suke da nisa sosai, babu dalilin da zai sa mu ƙi amincewa da tabbacin ganin wata daga maƙwabciyar ƙasa.”

Ya jaddada cewa wannan mataki ba na nuna rashin mutunta hukuncin Sarkin Musulmi ba ne, ko ƙin bin koyarwar addini ne.

“Yawancin lokaci muna bin umarnin Sarkin Musulmi wajen fara azumi da ƙare shi. Sai dai idan ya fito fili cewa an ga wata, dole ne mu yi aiki da koyarwar Manzo (SAW), koda kuwa hakan ya saɓa wa sanarwar Sarkin Musulmi,” in ji shi.

Lukuwa ya kuma ya yi misali da irin rawar da marigayi Abubakar Mahmoud Gumi ya taka a baya wajen sanar da ganin wata kafin a tattara wannan alhaki a hannun Sarkin Musulmi domin haɗin kan al’ummar Musulmi.

Ya bayyana cewa shawarar da Sarkin Musulmi ya yanke a wannan karon ba daidai ba ce, kuma ya dage kan cewa mabiyansa ba za su bi wannan umarni ba.