Kwankwaso Ya Bukaci ’Yan Najeriya Su Ci Gaba Da Marawa Sauye-Sauyen  Shugaba Tinubu Baya

Daga Muhammad Kabir, Kano

Wani jigo a jam’iyyar All Progressives Congress (APC), Dr Musa Illiyasu Kwankwaso, ya yaba wa Shugaban Ƙasa Bola Ahmed Tinubu kan manufofin gwamnatin tarayya na sake fasalin tattalin arzikin Najeriya da kuma kafa tubalin samun wadata mai ɗorewa.

Kwankwaso, wanda shi ne Daraktan Gudanar da Kuɗi na Hadejia-Jama’are River Basin Development Authority, ya bayyana hakan ne yayin da yake mayar da martani kan jawabin Shugaba Tinubu na bikin cikar Najeriya shekaru 66 da samun ’yancin kai.

’Yan Bindiga Sun Hallaka Hakimin Da Suka Sace A Kano

Ya ce jawabin shugaban ya bayyana yadda gwamnatin tarayya ke ƙoƙarin magance matsalolin tattalin arziki ta hanyar sauye-sauye, samar da ayyukan yi, bunƙasa noma da masana’antu, da kuma tallafa wa masu ƙaramin ƙarfi.

A cewarsa, matakan da gwamnatin ta ɗauka sun kasance masu wahala, amma sun kasance wani ɓangare na ƙoƙarin gyara matsalolin da suka daɗe suna addabar tattalin arzikin ƙasar.

Kwankwaso ya ce mayar da hankali kan rage tsadar rayuwa, ƙara samar da abinci, inganta ababen more rayuwa da samar da damammaki ga matasa na da muhimmanci wajen samun ci gaba mai ɗorewa.

Ya kuma yaba wa shirye-shiryen gwamnati na tallafa wa masu ƙaramin ƙarfi ta fuskar ilimi, kiwon lafiya, rance da sauran shirye-shiryen jin ƙai.

Ya ce Najeriya na da dimbin albarkatun ƙasa da matasa masu yawa, waɗanda za su iya taka muhimmiyar rawa wajen bunƙasa tattalin arzikin ƙasar idan aka samar da manufofi da ababen more rayuwa masu inganci.

A cikin jawabinsa, Shugaba Tinubu ya ce gwamnatin sa ta kammala wani mataki na gyaran tattalin arziki, inda yanzu za ta fi mayar da hankali kan samar da “wadata mai ɗorewa” da kuma faɗaɗa damar samun ayyukan yi.

Shugaban ya kuma ce gwamnati za ta mayar da hankali kan rage tsadar abinci da sufuri ta hanyar ƙara samar da abinci, bunƙasa ban ruwa da noma, da inganta hanyoyin sufuri da sauran ababen more rayuwa.

Kwankwaso ya yi kira ga gwamnatin tarayya da ta ci gaba da mai da hankali kan ƙalubalen da talakawa ke fuskanta, musamman tsadar abinci, sufuri, ilimi da kiwon lafiya.

Ya ce sauya tattalin arziki daga matakin gyara zuwa samun wadata zai buƙaci ci gaba da aiwatar da manufofi tare da haɗin gwiwar gwamnatin tarayya, jihohi da ƙananan hukumomi.

Ya taya ’yan Najeriya murnar cikar ƙasar shekaru 66 da samun ’yancin kai, tare da bayyana fatan cewa ƙasar za ta samu ƙarin ci gaba da bunƙasar tattalin arziki.

Dr Musa Illiyasu Kwankwaso ya kuma yi kira ga ’yan Najeriya da su ci gaba da kasancewa da fata kan makomar ƙasar, yana mai cewa ci gaba da aiwatar da manufofin tattalin arziki na da muhimmanci wajen samar da kyakkyawar makoma ga al’umma.