Jihar Kano Ce Ke Kan Gaba Wajen Yawan Masu Sabbin Rajistar Katin Zabe 441,845

Jihar Kano ta zama jiha ta farko a Najeriya wajen yawan sabbin masu rajistar katin zaɓe, bayan da ta samu jimillar sabbin masu rajista 441,845 a ƙarƙashin shirin ci gaba da rajistar masu zaɓe (CVR) zuwa ranar 15 ga Yunin 2026.

Rahoton da Kwamitin Fasahar Sadarwa da Tattara Bayanai (ICT da Data Collection) ya gabatar, ƙarƙashin jagorancin shugaban kwamitin kuma Kwamishinan Raya Kiwo na Jihar Kano, Dakta Aliyu Isa Aliyu, ya nuna cewa Kano ce ta zo ta farko a cikin jihohi 36 na tarayya da kuma Babban Birnin Tarayya (FCT), lamarin da ke nuna ƙara wayewar siyasa da kuma himmar al’ummar jihar wajen shiga harkokin dimokuraɗiyya.

Jam’iyyar NRM Ta Yi Barazanar Kai Karar Bashir Ibrahim Rogo Kotu Kan Ikirarin Shi Ne Ɗan Takarar Gwamnan Kano

Rahoton ya danganta wannan nasara da ƙoƙarin wayar da kan jama’a da kuma tattara masu rajista da gwamnatin jihar ƙarƙashin jagorancin Gwamna Abba Kabir Yusuf ta aiwatar. Ya bayyana cewa gwamnatin jihar ta kafa Kwamiti na Musamman Kan Rajistar Masu Zaɓe a shekarar 2025 domin ƙarfafa al’umma, musamman matasa, su yi rajista tare da shiga harkokin dimokuraɗiyya.

Binciken ya nuna akwai bambance-bambance a yawan masu rajista tsakanin ƙananan hukumomi 44 na jihar. Ƙaramar Hukumar Bichi ce ta fi kowacce yawan sabbin masu rajista da mutum 30,806, sai Kumbotso da mutum 18,701, Nasarawa 18,184, Dawaki Tofa 17,748, Bagwai 15,808 da Ungogo 15,584.

A gefe guda kuma, ƙananan hukumomin da suka fi samun ƙarancin masu rajista sun haɗa da Kunchi mai mutum 5,030, Warawa 5,462, Tsanyawa 5,597, Garun Malam 5,679 da Bunkure 5,699.

Rahoton ya nuna cewa yankunan birane da na kusa da birane ne suka fi samun yawan masu rajista, musamman a cikin babban birnin Kano da kewayensa, yayin da wasu yankunan karkara suka samu ƙarancin mahalarta rajistar.

Haka kuma, rahoton ya bayyana cewa matasa sun taka muhimmiyar rawa wajen nasarar da aka samu, lamarin da ke nuna ƙara wayewar siyasa da kuma amincewa da tsarin dimokuraɗiyya a tsakanin al’ummar jihar.

Rahoton ya bayyana nasarar da Bichi ta samu a matsayin abin a yaba, inda ya nuna cewa ƙaramar hukumar kaɗai ta samar da kusan kashi bakwai cikin ɗari na dukkan sabbin masu rajistar da aka samu a jihar, abin da ya nuna tasirin ƙoƙarin wayar da kai da tattara masu rajista a yankin.

Domin ci gaba da wannan nasara, kwamitin ya ba da shawarar ƙara ƙaimi wajen wayar da kan jama’a a ƙananan hukumomin da suka samu ƙarancin rajista. Haka kuma ya buƙaci shugabannin ƙananan hukumomi su ƙara jan hankalin matasa da masu aikin sa-kai na al’umma wajen taimakawa masu neman rajista, tare da haɗa kai da Hukumar Zaɓe Mai Zaman Kanta ta Ƙasa (INEC) domin sauƙaƙa kammala rajistar bayanan halittu (biometric registration).

Rahoton ya kammala da cewa rajistar sama da mutum 441,000 a Kano wata babbar alama ce ta jajircewar al’ummar jihar wajen shiga harkokin dimokuraɗiyya, tare da samar da muhimman bayanan da za su taimaka wajen tsara zaɓe, nazarin yawan jama’a da kuma gudanar da mulki bisa sahihan bayanai.Kanun Labari: Kano Ta Doke Jihohi 36 Da FCT, Ta Yi Rajistar Sabbin Masu Zaɓe 441,845.