Tiyatar Yoyon Fitsari: Mata 100 Sun Sami Tiyata Kyauta da Tallafin Ƙarfafawa A Kano

DAGA KABIRU BASIRU FULATAN 

Gidauniyar Festula ta Najeriya, ƙungiya mai tallafawa mata masu fama da yoyon fitsari (VVF), ta ba da tiyata kyauta da tallafin sana’o’in dogaro da kai ga mata 100 da ke fama da VVF a Jihar Kano.

An gudanar da tiyatar a Asibitin Kwararru na Murtala Muhammad da ke Kano.

An yi wa mata 100 da aka zaɓa tiyata don gyara yoyon fitsari, wanda yawanci ke faruwa ne sakamakon tsawaita lokacin haihuwa da wahala, musamman a yankunan da auren kanana da ƙarancin damar samun lafiya suka yi yawa.

Za a Ci Tarar N25,000 Ga Duk Wanda Aka Kama Yana Tofar da Yawu, Majina, Bahaya Ko Zubar Da Shara A Kano

Shugaban gidauniyar, Alhaji Musa Isah Baba Musa, ya yi kira ga gwamnatin Jihar Kano da ta ƙara himma wajen yaƙar VVF ta hanyar samar da kayan aikin tiyata kyauta da kayan sana’a ga wadanda suka tsira.Wannan zai rage wulakanci kuma zai ƙarfafawa masu Cutar dawo cikin al’umma.

Masana lafiya sun nuna auren wuri a matsayin babban sanadin yoyon fitsari a Arewacin Najeriya.

Jihar Kano ta ci gaba da kasancewa cikin yankuna masu fama da wannan cuta, duk da cewa hukumomi sun ce an fara samun  raguwar lamuran.

Yawancin wadanda suka samu Cutar VVF suna fuskantar saki, watsi da su, ko warewa daga al’umma saboda rashin fahimtar cutar.

Gidauniyar ta jaddada bukatar magance wannan kyamar a cikin al’umma.

Najeriya tana da mafi yawan mata masu fama da yoyon fitsari a duniya, musamman saboda al’adun gargajiya kamar auren wuri da rashin isasshen kula da lafiyar uwa da jariri.

Wannan shiri ya nuna rawar da ƙungiyoyi masu zaman kansu ke takawa wajen magance matsalolin lafiya da zamantakewa a yankunan da ba su da isassun ayyuka.

Duk da haka, ci gaba da taimakon gwamnati, inganta ababen more rayuwa na lafiya, da wayar da kan jama’a game da haƙƙin mata su ne mabuɗin kawar da yoyon fitsari da tallafa wa wadanda suka tsira na dogon lokaci.