Dakarun Soji Sun Hallaka ’Yan Ta’adda 12 A Sambisa Da Dutsen Mandara ‎

Sojojin Najeriya da ke ƙarƙashin Rundunar Aikin Haɗin Gwiwa ta Arewa maso Gabas, Operation Hadin Kai, sun ce sun hallaka ’yan ta’adda 12 na Boko Haram da ISWAP a wasu hare-hare da suka kai a Dajin Sambisa da yankin Dutsen Mandara.

‎A wata sanarwa da rundunar ta fitar, ta ce farmakin ya gudana ne a ranar 22 ga Janairu, 2026, lokacin da ’yan ta’addar suka yi yunƙurin kai wa dakarun kwanton bauna ta amfani da bama-baman gefen hanya da harbin bindiga.

‎Dakarun Soji Sun Hallaka ’Yan Ta’adda 12 A Sambisa Da Dutsen Mandara ‎

‎Sanarwar ta ce dakarun Sector 1 sun mayar da martani, inda suka kashe ’yan ta’adda 10 ciki har da wasu manyan kwamandoji biyu da aka bayyana sunayensu Basulhu da Ubaida.

‎Bayan haka, sojojin sun ci gaba da bincike a yankin, inda suka kwato bindigogi kirar AK-47 guda uku, bindiga mai harbi ɗaya, babura biyar, gurneti guda biyu, na’urorin sadarwa da sauran kayayyakin da ake amfani da su wajen kera bama-bamai.

‎A wani farmaki na daban da aka kai a yankin Malkube, rundunar ta ce ta sake hallaka ’yan ta’adda biyu, ba tare da an samu asarar rai a ɓangaren sojoji ba, tare da kwato ƙarin makamai da kayayyakin sadarwa.

‎Haka kuma, rundunar ta ce a safiyar ranar, wasu dakarunta sun hana ’yan ta’adda shiga Najeriya daga ƙasar Kamaru ta yankin Galakura, inda suka tilasta musu guduwa tare da barin babura da wasu kayayyaki a baya.

‎Rundunar sojin ta ce za ta ci gaba da matsa lamba a kan ’yan ta’adda a yankin Arewa maso Gabas, domin hana su sake samun damar kai hare-hare.

‎Sanarwar ta fito ne daga Laftanar Kanar Sani Uba, jami’in yaɗa labarai na Hedikwatar Rundunar Aikin Haɗin Gwiwa ta Arewa maso Gabas.

PRNIGERIA