TARIHI: Yadda FEDECO Ta Yi Wa Jam’iyyu Biyar Rajista Domin Fafatawa A Zaɓuɓɓukan Jamhuriya Ta Biyu.

A ranar 22 ga Disamba, 1978, Hukumar Zaɓe ta Tarayya ta Najeriya (FEDECO) ta yi wani muhimmin mataki a tarihin siyasar ƙasar, bayan da ta amince da rajistar jam’iyyun siyasa biyar domin shiga zaɓuɓɓukan da suka share fagen kafuwar Jamhuriya ta Biyu.

Matakin ya kasance wani ɓangare na shirin gwamnatin soja ƙarƙashin jagorancin Olusegun Obasanjo na mayar da mulki hannun farar hula bayan shekaru da dama na mulkin soja.

DAMINAR 2026: Yankuna 148 Na Fuskantar Barazanar Ambaliyar Ruwa A Jigawa – NEMA    ‎

Jam’iyyun da FEDECO ta yi wa rajista sun haɗa da National Party of Nigeria (NPN), Unity Party of Nigeria (UPN), Nigerian People’s Party (NPP), Great Nigeria People’s Party (GNPP) da kuma People’s Redemption Party (PRP).

Bayan samun rajista, jam’iyyun sun fara shirye-shiryen yaƙin neman zaɓe a sassa daban-daban na ƙasar, inda suka gabatar da manufofinsu ga ‘yan Najeriya a gabanin babban zaɓen shekarar 1979.

Masana tarihi sun bayyana cewa rajistar jam’iyyun ta zama wani muhimmin ginshiƙi wajen dawo da tsarin dimokuraɗiyya a ƙasar, domin ta bai wa ‘yan Najeriya damar sake zaɓar shugabanninsu ta hanyar zaɓe bayan dogon lokaci na mulkin soja.

A zaɓen da aka gudanar a shekarar 1979, jam’iyyar NPN ce ta samu nasara, inda ɗan takararta, Shehu Shagari, ya zama shugaban ƙasa na farko a Jamhuriya ta Biyu.

A ranar 1 ga Oktoba, 1979, gwamnatin soja ta miƙa mulki ga gwamnatin farar hula, lamarin da ya zama ɗaya daga cikin manyan abubuwan da suka sauya alkiblar siyasar Najeriya a wancan lokaci.

Masana na kallon ranar 22 ga Disamba, 1978 a matsayin wata rana mai muhimmanci a tarihin siyasar Najeriya, kasancewar ita ce ranar da aka buɗe sabon babi na fafatawar jam’iyyun siyasa wanda ya kai ga dawowar mulkin dimokuraɗiyya a ƙasar.

TARIHI TV