Matashi Ya Rasa Ransa Yayin Kokarin Nuna Bajinta Ga Budurwarsa

Wani matashi ya rasa ransa bayan ya nutse a wani tafkin wanka yayin da ake zargin yana kokarin nuna bajintarsa ga budurwarsa.

Rahotanni daga shaidu sun ce matashin ya bayyana wa budurwar cewa ya iya iyo, kafin ya shiga bangaren tafkin da ruwa ya fi zurfi.

Sai dai jim kadan bayan shiga ruwan, ya fara nuna alamun cewa yana cikin matsala, inda daga bisani ya nutse kafin mutanen da ke wurin su yi kokarin ceto shi.

Dakarun Soji Sun Halaka Ƴan Ta’adda Sama Da 50 A Borno

An ce an ciro matashin daga cikin ruwan, amma kafin a kai masa cikakken agajin gaggawa tuni ya rasu.

Wani bidiyo da ke yawo a kafafen sada zumunta ya nuna yadda jama’a suka taru a wurin bayan faruwar lamarin, yayin da alhini da firgici suka mamaye masu kallo.

Rahotanni sun kuma nuna cewa babu jami’in ceto na tafkin (lifeguard) a bakin aiki a lokacin da lamarin ya faru, abin da ya jawo tambayoyi kan matakan tsaro da aka tanada a wurin.

Har zuwa lokacin hada wannan rahoto, ba a samu karin bayani daga hukumomin da abin ya shafa kan aukuwar lamarin ba.

PLATINUM POST NEWS