Farfesa Adamu Gwarzo: Jagoran Da Ke Daga Darajar Ilimi Da Ci gaban Dan Adam A Afirka

DAGA MUSA ABDULLAHI SUFI

A daidai lokacin da nahiyar Afirka ke neman shugabanni masu hangen nesa da za su kawo sauyi a fannonin ilimi, kirkire-kirkire, kasuwanci da ci gaban al’umma, sunan Farfesa Adamu Abubakar Gwarzo na kara fitowa fili a matsayin daya daga cikin matasan da suka zamo abin koyi a nahiyar da ma duniya baki daya.

Daga Arewacin Najeriya zuwa manyan cibiyoyin ilimi na duniya, Farfesa Gwarzo ya zama abin misali wajen jagoranci mai hangen nesa, bunkasa ilimi da kuma bai wa matasa damar cimma burinsu. Nasarorin da ya samu ba wai kawai na kansa ba ne, illa wata babbar tafiya ce ta inganta rayuwar al’umma ta hanyar ilimi, bincike, kirkire-kirkire, tallafawa lafiya da habaka matasa.

Tun yana matashi, Farfesa Gwarzo ya cimma abubuwan da hatta wasu manyan hukumomi da gwamnatoci kan dauki shekaru masu yawa kafin su aiwatar da su. Yaduwar ayyukansa a bangarorin ilimi, jin kai da ci gaban al’umma ya sanya ana kallonsa a matsayin daya daga cikin manyan masu kawo sauyi a harkar ilimi da ci gaban zamantakewa a Afirka ta zamani.

Juyin Juya Hali A Fannin Ilimi A Afirka

Tafiyar Farfesa Gwarzo na nuni da yadda ‘yan Afirka ke samar da mafita ga matsalolin Afirka da kansu. Ta hanyar kafa jami’o’i da cibiyoyin ilimi masu inganci da ke bin ka’idojin kasa da kasa, ya samar da damar karatu ga dubban dalibai daga kasashe daban-daban da kuma mabambantan al’adu.

Daya daga cikin cibiyoyin da ake alakanta su da hangen nesansa ita ce Maryam Abacha American University of Nigeria, wadda ta yi fice wajen samar da ingantaccen ilimi, bincike da kirkire-kirkire tare da hada dalibai daga sassa daban-daban na duniya.

Abin da ya bambanta tsarin ilimin Farfesa Gwarzo shi ne mayar da hankali wajen koyar da ilimin da zai amfani al’umma kai tsaye, bunkasa tunanin kirkire-kirkire, jagoranci da koyar da dabarun magance matsalolin zamani. Maimakon samar da masu neman aiki kawai, cibiyoyinsa na kokarin fitar da matasa masu iya kirkira da samar da mafita ga al’umma.

Baya ga gina makarantu, ya kuma mayar da hankali wajen bayar da tallafin karatu ga marasa galihu, karfafa ilimin mata, bunkasa kimiyya da fasaha, horas da shugabannin matasa, hada gwiwar bincike da jami’o’in duniya da kuma ayyukan raya al’umma.

Hangen Nesa Fiye Da Kasuwanci

Ba kamar wasu cibiyoyin ilimi masu zaman kansu da ke mayar da hankali kan riba kawai ba, ayyukan Farfesa Gwarzo na nuna irin shugabancin da ke da manufar canza rayuwar al’umma baki daya.

Ta hanyar gidauniyar Adamu Abubakar Gwarzo Foundation, mutane da dama sun amfana da tallafin ilimi, kula da lafiya, samar da ruwa da tsafta, wayar da kai kan sauyin yanayi da kuma shirye-shiryen tallafa wa matasa da mata.

Ayyukansa sun dace da manufofin ci gaba masu dorewa na duniya, musamman a bangarorin samar da ingantaccen ilimi, daidaito tsakanin jinsi, rage talauci, bunkasa matasa, kirkire-kirkire, lafiya da walwalar al’umma.

A lokacin da matasa da dama a Afirka ke fama da rashin aikin yi da karancin damar samun ilimi, cibiyoyi da shirye-shiryen Farfesa Gwarzo na ci gaba da zama wata hanya ta samar da fata da dama ga dubban matasa.

Dalilan Da Ke Sa Ya Cancanci Girmamawa A Duniya

Ana kara samun kiraye-kirayen a bai wa Farfesa Gwarzo lambar yabo da karramawa a matakin duniya saboda irin gudunmawar da yake bayarwa a bangarori daban-daban.

Daga cikin dalilan akwai:

1. Samar Da Manyan Cibiyoyin Ilimi Tun Yana Matashi

Ana kallon Farfesa Gwarzo a matsayin daya daga cikin matasan ‘yan Afirka da suka kafa manyan cibiyoyin ilimi masu tasiri a nahiyar cikin kankanin lokaci.

2. Hada Afirka Da Manyan Cibiyoyin Ilimi Na Duniya

Hadin gwiwar da yake yi da jami’o’i da cibiyoyin bincike na kasa da kasa ya taimaka wajen kara fito da martabar Afirka a fagen ilimi.

3. Gina Jarin Dan Adam

Dubban dalibai, masu bincike da matasa masu kirkire-kirkire sun amfana kai tsaye da tallafin da yake bayarwa a bangaren ilimi da ci gaba.

4. Hada Ilimi Da Ayyukan Jin Kai

Kadanne daga cikin masu zuba jari a ilimi ke iya hada ilimi, taimakon jama’a, tallafawa lafiya da bunkasa matasa a lokaci guda kamar yadda yake yi.

5. Inganta Kallon Da Duniya Ke Yi Wa Afirka

A lokacin da ake yawan alakanta Afirka da talauci da rikice-rikice, nasarorin Farfesa Gwarzo na nuna wata sabuwar fuska ta nahiyar mai cike da ilimi, kirkire-kirkire da ci gaba.

Zaburar Da Sabbin Matasan Afirka

Babban darasin da ke cikin rayuwar Farfesa Gwarzo shi ne yadda yake zaburar da matasa su yi imani da kansu da kuma kokarin gina manyan cibiyoyi masu anfani ga al’umma.

Tafiyarsa na nuna cewa matasan Afirka na iya kafa cibiyoyi masu inganci a duniya, su shawo kan kalubale, kuma ilimi na nan a matsayin babbar hanyar samun ci gaba.

Haka kuma nasarorinsa na jefa kalubale ga shugabanni da masu hannu da shuni a Afirka da su kara saka hannun jari a bangarorin ilimi, bincike da bunkasa matasa.

Makomar Sauyin Afirka

Makomar Afirka za ta dogara ne da irin shugabannin da za su iya mayar da tunani zuwa aiki, sannan su gina cibiyoyin da za su amfani al’umma na dogon lokaci.

Ayyuka da hangen nesan Farfesa Adamu Abubakar Gwarzo na nuna cewa yana cikin sabon rukunin matasan ‘yan Afirka masu kokarin sauya alkiblar nahiyar ta hanyar ilimi, kirkire-kirkire da ci gaban dan Adam.

Idan aka ci gaba da fadada wannan hangen nesa, akwai yiwuwar ayyukansa su ci gaba da yin tasiri a bangarorin ilimi, lafiya, bincike da ci gaban al’umma na tsawon shekaru masu zuwa.

Kuma a tarihin sauyin da Afirka ke ciki a wannan zamani, sunansa na iya kasancewa cikin wadanda ba kawai suka yi nasara a rayuwarsu ba, har ma suka gina hanyoyin da za su amfani bil’adama baki daya.