Akalla sojoji tara ne suka mutu a harin kunar bakin wake a Pakistan

Akalla sojoji tara ne suka mutu wasu da dama kuma suka jikkata a wani harin kunar bakin wake da aka kai a kudu maso yammacin lardin Balochistan na Pakistan.

Kakakin rundunar ‘yan sandan yankin Ijaz Ahmad ya bayyana a ranar Litinin cewa, an kashe akalla sojoji tara na sansanin ‘yan sanda na Balochistan Constabulary.

Sojoji Sun Dakile Harin Boko Haram A Monguno

Sojojin na tafiya ne a cikin wata motar bas a gundumar Kachhi na lardin Balochistan – mai tazarar kilomita 160 daga kudu maso gabashin lardin Quetta – lokacin da motar ta fashe, a cewar kakakin.

Wani mai magana da yawun ‘yan sanda Mehmood Khan Notizai ya shaidawa kamfanin dillancin labarai na Reuters cewa dan kunar bakin waken da ke kan babur “ya bugi motar daga baya”.

Sojojin sun dawo ne daga wani wasan baje kolin shanu na tsawon mako guda da suka yi a yankin, in ji jami’ai.

Jami’an asibitin sun ce akalla ‘yan sanda bakwai ne suka jikkata a harin, wanda shi ne na baya bayan nan da aka kai wa jami’an tsaro a Pakistan.

Kawo yanzu dai babu wata kungiya da ta dauki alhakin kai harin.

Wakilin Al Jazeera, Kamal Hyder, wanda ke bayar da rahoto daga Islamabad, ya ce masu bincike na duba yanayin fashewar.

Ya kara da cewa “Wannan ba shine karo na farko da ake kaiwa ‘yan sanda ko jami’an tsaro ko kuma dakarun soji na yau da kullun hari a Balochistan ba.”

Kungiyoyin masu dauke da makamai na kabilar Baloch sun kwashe shekaru da dama suna yakar gwamnati, suna zarginta da yin amfani da albarkatun iskar gas da ma’adinai na Balochistan.