Fasinjoji Da Dama Sun Jikkata, Bayan Da  Tankar Mai Ta Yi Bindiga A Abuja

DAGA NUSIBA ABDULLAHI TUKUNTAWA

Fasinjoji da dama sun jikkata, bayan da wata tankar mai ta yi bindiga da yammacin Litinin a kan titin Shehu Shagari da ke yankin Maitama a Abuja.

Lamarin ya faru ne da misalin ƙarfe 6:40 na yamma kusa da ginin ofishin Jakadancin Birtaniya.

Jami’an Hukumar EFCC Sun Gargaɗi Masu Amfani Da Kayan Aikinsu Suna Haɗa Bidiyon Barkwanci

Wani ganau, Saminu Sani, ya ce wutar da ta tashi yana kai wa tsayin hawa na huɗu na benen ginin Ofishin Jakadancin Birtaniya, lamarin da ya sanya direbobi barin motocinsu domin neman tsira.

Daily Trust ta ruwaito cewa lamarin ya haddasa cunkoso mai yawan gaske a hanyoyi guda huɗu da ke haɗa Kasuwar Manoma, Otal ɗin Nicon Hilton, hedikwatar MTN, da kuma Chicken House.

Wani jami’in lafiya a Asibitin Maitama, wanda ya nemi a sakaya sunansa, ya shaida cewar an kawo waɗanda suka jikkata don ba su agajin gaggawa.

Wasu daga cikin waɗanda suka tsira sun ce direban tankar ya tsere daga wajen jim kaɗan bayan tankar ta kife a ƙasa.