JAMB ta sanar da  Fara Sayar Da Fom Din Shiga Jami’a Kai Tsaye (DE) 

Hukumar shirya jarabawar shiga makarantun gaba da sakandire (JAMB) ta sanar da cewa za ta fara sayar da fom din shiga jami’a kai tsaye (Direct Entry, DE) daga ranar Laraba, 12 ga Maris, 2025. Wannan sanarwa ta fito ne daga kakakin hukumar, Fabian Benjamin, a ranar Litinin, inda ya bayyana cewa wannan rajistar na da matukar muhimmanci ga masu neman ci gaba da karatunsu a manyan makarantu.

Masu neman shiga ta hanyar DE sune wadanda suka kammala karatun digiri, difloma, ko wasu takardu masu dacewa kuma suna son shiga jami’o’in da suka fi so. Hukumar ta kuma jaddada cewa an shirya wannan mataki ne bayan nasarar kammala jarrabawar UTME da aka gudanar a ranar Asabar, 8 ga Maris, 2025.

Da Dumi Dumi : Nasir El-Rufa’i Ya Fice Daga jam’iyyar APC Zuwa SDP

JAMB ta yi kakkausar gargadi game da bin dukkan sharuddan shiga jami’o’i, tare da faɗakar da masu neman shiga cewa za a yi hukunci mai tsanani kan duk wanda aka kama da takarda ko bayanan karya. Hukumar ta kuma bayyana cewa za a iya yin rajista ne kawai a Cibiyar Rajista ta JAMB, don tabbatar da inganci da kare haƙƙin masu neman shiga.

Wannan mataki na fara sayar da fom din DE yana nuna kokarin hukumar na samar da damar shiga manyan makarantu cikin gaskiya da adalci ga dukkan masu neman ilimi.