Tashin Farashin Gas Ya Tilasta Wa ‘Yan Najeriya Komawa Amfani Da Gawayi

Farashin gas ɗin girki ya yi tashin gwauron zabo a fadin Najeriya, lamarin da ya tilasta wa gidaje da dama komawa amfani da itace wuta da gawayi wajen dafa abinci. Masana na gargadin cewa wannan dabi’a na da illa ga lafiya da muhalli.

Binciken da Jaridar PUNCH ta gudanar ya nuna cewa farashin gas ɗin ya tashi daga kusan N1,200 a farkon shekarar 2025 zuwa tsakanin N2,000 zuwa N3,000 a wasu sassan ƙasar. Wannan tashin farashin ya sa ‘yan Najeriya da dama sun koma hanyoyin gargajiya na girki.

Shugaba Tinubu Zai Bar Abuja Zuwa Kasar Italiya 

Masu sharhi sun ce rikicin masana’antar mai ne ya yi sanadiyyar wannan tashin farashin, musamman yajin aikin ƙungiyar PENGASSAN bayan zargin sallamar ma’aikata a matatar mai ta Dangote. Duk da cewa gwamnati ta shiga tsakani aka dakatar da yajin aikin, farashin gas bai koma kan yadda ya kamata ba.

Gidaje da dama yanzu sun fi karkata wajen amfani da itace da gawayi saboda rahusa, duk da sanin hatsarin da hakan ke da shi ga lafiyar jiki. Masu amfani da gawayi na fuskantar matsaloli irin su cututtuka na numfashi da ƙwayoyin cuta masu yawa.

Hukumar Lafiya ta Duniya (WHO) ta ce hayakin itace yana kashe mata da yara da yawa a Najeriya, inda ake kiyasin mutuwar mutane 93,300 a duk shekara saboda shakar hayakin buhun itace da ƙoƙon shanu. Wannan na nuna cewa koma baya ga gawayi na da haɗari sosai ga lafiyar al’umma.