Rundunar Soji Ta Kama Ɗan China A Borno Bisa Zargin Hulɗa Da ‘Yan Ta’adda

Rundunar Tsaron Najeriya ta bayyana cewa ta kama wani ɗan ƙasar China yayin wani gagarumin samame da dakarunta suka gudanar a Jihar Borno, domin ci gaba da murkushe ayyukan ta’addanci a yankin Arewa maso Gabas.

Daraktan Yaɗa Labarai na Rundunar Tsaro, Manjo Janar Markus Kangye, ne ya bayyana hakan a lokacin wani taron manema labarai da aka gudanar a Abuja ranar Juma’a.

Abin Da Ya Kamata A Sani Game Da Hare-Haren Da Isra’ila Ta Ƙaddamar Kan Iran

Ya ce mutumin, wanda har yanzu ba a bayyana sunansa ba, ya bayyana kansa a matsayin ma’aikacin hakar ma’adanai, amma rundunar tana ci gaba da bincike domin gano ainihin dalilin da ya sa ya ke a yankin da ake gudanar da aikin tsaro.

“Wannan mataki na nuna zurfin binciken da rundunar ke ci gaba da yi, musamman ganin irin matsin lambar da ake fuskanta daga ‘yan ta’adda da kuma masu mara musu baya.”

A cewar Manjo Janar Kangye, an kuma cafke wasu mutane biyar da ake zargin suna taimaka wa ‘yan ta’adda da kayayyaki da bayanan sirri.

Kama ɗan ƙasar China ya biyo bayan cafke wasu mutane huɗu ‘yan ƙasar Pakistan da ake zargi da koyar da dabarun ta’addanci, kamar yadda rundunar ta bayyana makon jiya.

Manjo Janar Kangye ya jaddada cewa rundunar tsaro na gudanar da bincike mai zurfi domin tantance ko akwai alaƙa tsakanin waɗannan mutane da ƙungiyoyin ta’addanci da ke addabar ƙasar.

Kazalika, ya karyata zargin da wasu ke yi cewa sojoji ba sa gaggauta kai dauki yayin da ake kai hare-hare, musamman a ƙauyuka masu nisa, yana mai cewa:

“Rundunar tsaro tana da tsare-tsare da dabarun da ke ba da damar gaggauta tura jami’ai zuwa wuraren da ake buƙata a kowane lokaci.”

Rundunar ta ce za ta ci gaba da gudanar da bincike kan duk wani da ake zargi da hannu ko hulɗa da ‘yan ta’adda, komai matsayin sa ko ƙasar da ya fito.

PUNCH