“Rikicin ’Yan El-rufai: Bashir Ya Ce Bello Ba Zai Iya Yi Masa Komai Ba”

Ɗan tsohon Gwamnan Jihar Kaduna, Nasir El-Rufai, Bashir El-Rufai, ya ce yana kwana da wuƙaƙe da bindigogi, yana mai cewa ɗan uwansa kuma ɗan Majalisar Wakilai mai wakiltar Kaduna ta Arewa, Bello El-Rufai, ba zai iya yi masa komai ba.

Bashir ya bayyana hakan ne a wani jerin rubuce-rubuce da ya wallafa a shafinsa na X a ranar Asabar, inda yake sukar ɗan uwansa kan wasu batutuwan siyasa da na iyali. Daga baya ya goge wasu daga cikin rubuce-rubucen, waɗanda tuni suka yaɗu a kafafen sada zumunta.

Shugaba Tinubu Ya Nemi Kotun Amurka Ta Hana FBI Da DEA Fitar Da Bayanansa

A cikin rubuce-rubucen nasa, Bashir ya soki alaƙar siyasar Bello da Gwamnan Kaduna, Uba Sani, yana mai nuna rashin amincewarsa da yadda ɗan uwansa ke gudanar da harkokin siyasarsa a baya-bayan nan.

Bashir ya kuma yi wasu zarge-zarge kan Bello, ciki har da cewa ya fi mayar da hankali kan shan barasa da amfani da hodar iblis maimakon wakiltar al’ummar Kaduna ta Arewa da suka zaɓe shi a Majalisar Wakilai.

Sai dai waɗannan zarge-zarge da Bashir ya yi ba su samu tabbaci daga wata majiya mai zaman kanta ba, yayin da Bello El-Rufai bai fito fili ya mayar da martani kan zarge-zargen ba a lokacin da rahotannin suka bayyana.

Rikicin ya jawo ce-ce-ku-ce sosai a kafafen sada zumunta, musamman ganin cewa ’yan’uwan biyu ’ya’yan tsohon gwamnan Kaduna ne, kuma lamarin ya sauya daga sabanin siyasa zuwa musayar kalamai masu zafi tsakanin ’yan uwa.

DAILY TRUST