Hukumar Zabe Ta Baiwa Jam’iyyun Siyasa Shawarar Bin Ka’idoji Wajen Zaben Fidda Gwani

Daga yasir sani abdullahi

Hukumar zabe mai zaman kan ta ta kasa ta ba wa jam’iyu shawara a kan bin tsarin demokradiyyar cikin gida da dokokin zabe a wurin gudanar da zaben fidda gwani a yayin da ake tunkarar babban zaben 2023.

Hukumar ta ba da shawarar ne cikin wata sanarwa da Mista Festus Okoye, jami’in wayar da kai na hukumar ya fitar a ranar Talata, a Abuja.

Okoye ya ce duk wata jam’iyya da ta gaza bin dokokin da aka tanada wurin gudanar da zaben fidda gwaninta ba za a amince da zabenta ba.

“Hukumar ta jaddadawa jam’iyun tsarin bin dokokin demokradiyyar cikin gida, kamar yanda yake tsare a kundin tsarin mulkin su,ka’idoji,dokar zabe da sauran tsare tsare da ka’idojin da hukumar ta bayar.

“Yan takarar su guda 1,491 na kananan hukumomi wanda za’a gudanar da zabensu a 2023, tilas ya fito daga mulkin dimokaradiyya, bayyananne da kuma ingantancen zaben fidda gwani, a kan tsarin da aka tanada a a sashe na 29 da 84 na kundin tsarin zabe na shekarar 2022.

“Duk jam’iyyar da ta gaza bin tanadin kundin tsarin zaben a wurin gudanar da zaben fidda gwanin ta, ba za a sa dan takarar ta a matsayin ta yake nema ba a babban zabe.