Gwamnatin Kano Ta Amince Da Biyan Albashin Watan Maris Da Wuri Domin Sauƙaƙa Shirye-shiryen Sallah

Gwamnatin Jihar Kano ta amince da biyan albashin watan Maris na shekarar 2026 da wuri ga ma’aikatan gwamnati domin ba su damar yin shirye-shiryen bikin ƙaramar Sallah cikin sauƙi.

Mukaddashiyar Shugabar Ma’aikatan Gwamnatin Jihar Kano, Hajiya Bilkisu Shehu Maimota, ta ce Gwamna ya bayar da umarnin a saki kuɗaɗen albashin tare da fara biyansu nan take.

Gwamnatin Kano Ta Amince Da Ayyuka Na Sama Da Biliyan ₦310

A cewarta, an ɗauki wannan mataki ne domin sauƙaƙa wa ma’aikata shirye-shiryen Eid el-Fitr, ta yadda za su gudanar da bukukuwan Sallah cikin walwala da mutunci.

Sanarwar ta ce biyan albashin da wuri na nuna yadda gwamnatin jihar ke bai wa jin daɗin ma’aikata muhimmanci, tare da yaba wa irin gudunmawar da suke bayarwa wajen ci gaban jihar.

Hajiya Bilkisu Shehu Maimota ta kuma buƙaci ma’aikatan gwamnati da su yi amfani da wannan dama yadda ya kamata, tare da ci gaba da nuna jajircewa, ladabi da ƙwarewa wajen gudanar da ayyukansu.

Gwamnatin ta kuma sake jaddada aniyarta ta ci gaba da aiwatar da manufofin da za su inganta walwalar ma’aikata tare da ƙara haɓaka ƙwazo da ingancin aiki a fannin aikin gwamnati.