Tsohon IGP Abba Ya Nemi Kafa Cibiyar Horar Da ’Yan Jarida A Radio Kano

Tsohon Sufeto-Janar na ’Yan Sandan Najeriya, Alhaji Suleiman Abba, ya yi kira da a kafa cibiyar horas da ma’aikatan kafafen yaɗa labarai a gidan rediyon Radio Kano.

Abba ya yi wannan kiran ne a yayin bikin cika shekaru 80 da kafuwar Radio Kano da aka gudanar ranar Asabar.

Yau Asabar 19/09/2026 Rediyo Kano Ke Cika Shekara 80 Da Kafuwa

Ya ce cibiyar za ta taimaka wajen horar da ’yan jarida, masu shirya shirye-shirye, masu gabatar da shirye-shirye, ma’aikatan harkokin kasuwanci da sauran ƙwararrun ma’aikatan kafafen yaɗa labarai.

Tsohon IGP ɗin, wanda ya taɓa aiki a Radio Kano kafin ya shiga rundunar ’yan sandan Najeriya, ya ce tarihin gidan rediyon na shekaru 80 da kuma ƙwararrun ma’aikatan da ya samar sun sanya shi cikin matsayi mai kyau na ɗaukar nauyin cibiyar.

A cewarsa, tsofaffin ma’aikatan Radio Kano da suka samu ƙwarewa tsawon shekaru za su iya bayar da gudunmawa wajen horas da sabbin ma’aikatan kafafen yaɗa labarai.

“Radio Kano ta fi gidan rediyo kawai, domin tana da damar samar da ’yan jarida, masu shirya shirye-shirye, masu gabatarwa da ma’aikatan harkokin kasuwanci da sauran su,” in ji shi.

Ya kuma bukaci a yi amfani da faffadan filin da Radio Kano ke da shi wajen samar da cibiyar horaswar da sauran abubuwan da za su taimaka wajen bunƙasa gidan rediyon.

Abba ya ce ya kamata a samar da tsari na musamman da zai tabbatar da cewa Radio Kano ta ci gaba da zama wurin horas da matasan da ke son shiga aikin jarida da sauran sana’o’in kafafen yaɗa labarai.

Da yake magana kan irin alaƙar da ke tsakaninsa da gidan rediyon, tsohon IGP ɗin ya ce lokacin da ya yi aiki a matsayin ma’aikaci na ɗan lokaci a Radio Kano ya taimaka wajen gina ƙwarewarsa.

Ya ce har yanzu yana alfahari da Radio Kano saboda damar da ta ba shi a farkon rayuwarsa ta neman aiki.

“Ina alfahari da alaƙata da Radio Kano saboda lokacin da na zo neman aiki, babu wanda ya gabatar da ni,” in ji shi.

Radio Kano na bikin cika shekaru 80 da kafuwa, yayin da shawarar tsohon IGP Abba ta mayar da hankali kan yadda za a ci gaba da amfani da gadon gidan rediyon wajen horar da ƙarni na gaba na ƙwararrun ma’aikatan kafafen yaɗa labarai.