Kunkurun Fadar Alaafin Na Oyo Mai Shekaru 420 Ya Mutu

Kunkurun Fadar Alaafin Na Oyo Mai Sheka Wani tsohon kunkuru mai suna Baba, wanda fadar Alaafin ta ce ya kai kimanin shekaru 420, ya mutu a fadar Alaafin Oyo da ke Jihar Oyo.

Baba ya rasu ne a ranar Litinin bayan ya kamu da rashin lafiya, inda rahotanni suka ce ya daina cin abinci kafin daga bisani ya mutu. Daga baya aka binne shi a cikin harabar fadar.

Kashi 61 Cikin 100 Na ‘Yan Nijeriya Da Suka Mallaki Hankalinsu Na Cikin Matsanancin Rashin Kudi —Rahoto

Daraktan Yaɗa Labarai da Hulɗa da Jama’a na Alaafin, Bode Durojaiye, ya bayyana cewa Baba ya kasance wani muhimmin sashe na tarihin baka da al’adun masarautar Oyo, inda sarakuna daban-daban suka ci gaba da kula da shi tsawon shekaru.

A cewar fadar, tarihin baka ya nuna cewa an kawo Baba daga Oyo-Ile, tsohuwar hedikwatar Daular Oyo, zuwa fadar da ke Oyo ta yanzu. Daga nan ne ya zama wani abu da ake danganta shi da tarihin masarautar, kuma ya ci gaba da rayuwa a lokacin mulkin sarakuna da dama.

Fadar ta ce Baba ya kasance abin jan hankalin masu yawon buɗe ido, inda mutane da dama ke ziyartar fadar domin ganin kunkurun saboda tsufansa da girmansa. An kuma ce jami’ai biyu na fadar ne ke kula da lafiyarsa da ciyar da shi.

Rahotanni sun bayyana cewa Baba na cin kankana, kunun masara da aka nade cikin ganye, da kuma ciyawa. Sai dai, duk da cewa fadar ta danganta masa shekaru 420, ba a samu wata hujjar kimiyya mai zaman kanta da ta tabbatar da wannan adadi ba, don haka ana ɗaukar shekarun a matsayin wani ɓangare na tarihin baka na fadar.

WIKKI TIME’S