Atiku: Ba Kai Za Ka Yanke Wa Matasa Shawara Ba — Adnan Ya Fadawa Baba-Ahmed”

Tsohon dan takarar Majalisar Dokokin Jihar Kano, Adnan Mukhtar Tudun Wada, ya kalubalanci tsohon mai ba shugaban kasa shawara kan harkokin siyasa, Dakta Hakeem Baba-Ahmed, yana mai cewa bai da ikon yanke shawara a kan matasan Najeriya.

‎Adnan ya yi wannan jawabi ne a wata sanarwa da ya fitar a Kano, inda ya bayyana cewa kiran da Baba-Ahmed ya yi na cewa tsohon Mataimakin Shugaban Kasa, Alhaji Atiku Abubakar, ya janye daga takarar shugabancin kasa, ba daidai ba ne.

‎‎Kanawa Sun Shiga Ruɗani: Waye Galadiman Kano na Gaskiya?

‎“A gaskiya wannan magana ta Baba-Ahmed ba ta dace ba, kuma ba shi da hurumin yanke wa matasa shawara. Shi da kansa ya karbi mukamin da bai dace da shekarunsa ba a matsayin mai ba Mataimakin Shugaban Kasa shawara, amma yau yana ce wa wasu su janye don a bai wa matasa dama,” inji Adnan.

‎Ya ce matasa sun isa su fadi albarkacin bakinsu ba tare da wani ya musu jagora ba. “Ni na tsaya takara ina da shekaru 26. Baba-Ahmed ya rike mukamai da dama a matashin sa, amma bai taba ba da damar da yake kira a yanzu ba,” inji shi.

‎Adnan ya ce ba a kan shekaru ne shugabanci ba, amma a kan cancanta da jajircewa wajen hidimtawa kasa.

‎“Maganar da ya yi wa Atiku cewa ya janye ba wai shawara ba ce, cin mutunci ne . Idan har matasa za su jagoranci kasa, to su nuna bambanci a inda aka ba su dama kamar gwamna da ‘yan majalisa. Amma abin ba haka yake ba,” inji shi.

‎Ya ce Atiku yana bai wa matasa dama tun lokacin da yake mataimakin shugaban kasa, kuma har yanzu shi kadai ne jagoran adawa da ke bayyana ra’ayinsa a fili.

‎Adnan ya kuma zargi Baba-Ahmed da kokarin komawa kusa da Atiku bayan ya ci amanarsa a baya. Ya ce, “Ina kalubalantar Baba-Ahmed ya fadi sunan matashi daya da zai iya daukar nauyin adawa da wannan gwamnati kamar Atiku.”

‎A karshe, Adnan ya bukaci ‘yan Najeriya su goyi bayan Atiku Abubakar, yana mai cewa shi ne kadai dan adawar da ke da kwarin gwiwar tunkarar gwamnatin Shugaba Tinubu.

‎

‎