‎Kanawa Sun Shiga Ruɗani: Waye Galadiman Kano na Gaskiya?

Yau Juma’a birnin Kano ya shiga cikin ruɗani bayan da sarakunan da ke ikirarin zama Sarakunan Kano biyu suka naɗa Galadima biyu dabam-dabam, lamarin da ya bar al’umma cikin tambaya kan wanene Galadiman Kano na gaskiya.

‎Sarkin Kano Aminu Ado Bayero ya naɗa ɗan uwansa, Sunusi Ado Bayero, a matsayin sabon Galadiman Kano, yayin wata walima da aka gudanar a fadar masarautar Kano da ke Nasarawa.

‎Dakarun Soji Sun Kashe Wasu Fitattun Shugabannin ‘Yan Bindiga Guda Uku A Zamfara

‎A lokaci guda kuwa, Sarkin Kano Muhammadu Sunusi II, ya naɗa ɗan uwan mahaifinsa, Munir Sunusi, a matsayin Galadiman Kano a wani biki da ya gudana a fadar Kofar Kudu, wanda Gwamnan Jihar Kano, Abba Kabir Yusuf, ya halarta.

‎Wannan sabani ya biyo bayan rasuwar marigayi Galadiman Kano, Alhaji Abbas Sunusi, wanda ya bar gurbin da yanzu bangarori biyu ke takara akansa.

‎Masu sharhi na ganin cewa wannan naɗe-naɗen biyu zai iya jefa masarautar Kano cikin wani sabon rikici, musamman ganin yadda al’umma suka rabu kashi biyu – wasu na tare da Aminu Ado Bayero, yayin da wasu ke goyon bayan Muhammadu Sunusi II.