News
Kwanaki 40 Bayan Kisan Maharba A Edo: Iyalan Mamata Na Neman A Biya Su Diyya
Kwanaki 40 bayan kisan maharba 16 daga Jihar Kano a garin Uromi, Ƙaramar Hukumar Esan ta Arewa Maso Gabas a Jihar Edo, iyalan mamatan sun ci gaba da kira ga gwamnati da ta biya su diyya tare da tabbatar da adalci.
An kashe maharban ne a watan Maris yayin da suke kan hanyarsu ta dawowa Kano domin gudanar da bikin Sallah Ƙarama. Maharban sun fito daga ƙananan hukumomin Kibiya, Rano da Bunkure na Jihar Kano.
Sojojin Najeriya Sun Kashe ‘Yan Ta’adda Fiye Dubu 13 Da 500 – Badaru Abubakar
A wani taro da iyalan suka gudanar a harabar sakatariyar Ƙaramar Hukumar Kibiya, an gudanar da karatun Alƙur’ani domin roƙon rahamar Allah ga mamatan. Iyalin sun bayyana damuwa kan yadda gwamnati ta gaza daukar matakin da ya kamata a game da lamarin.
“An ce an kama wasu, amma har yau ba mu ji komai ba. Na rasa ɗana, kuma rayuwata ta shiga cikin bakin ciki da wahala. Mafi ƙaranci, gwamnati ta fito ta faɗa mana halin da ake ciki,” in ji Malam Bala Dutse, mahaifin ɗaya daga cikin mamatan.
Hauwa’u Isa, matar ɗaya daga cikin maharban da aka kashe, ta bayyana irin ƙuncin rayuwar da take ciki tare da ’ya’yanta uku.
“Sun ce za su ba mu adalci, amma har yanzu babu komai. Har yaushe za mu jira?” in ji ta.
A baya, gwamnonin Kano da Edo — Abba Kabir Yusuf da Monday Okpebholo — sun ziyarci iyalan mamatan inda suka yi alkawarin tallafi da adalci. Haka kuma, Gwamna Abba ya kafa kwamitin bincike ƙarƙashin jagorancin mataimakinsa, Aminu Abdulsalam Gwarzo.
Sai dai, iyalan sun ce har yanzu ba su ga wani ci gaban bincike ko tallafi ba.
Mataimakin Shugaban Ƙaramar Hukumar Kibiya, Nasiru Adam Abdulaziz, ya bayyana cewa an riga an kama wasu da ake zargi da hannu a kisan, kuma an tura su Abuja. Sai dai ya bukaci a gudanar da shari’a a bainar jama’a domin tabbatar da adalci da gaskiya.
Wannan kisa ya sake haskaka matsalar rikice-rikicen ƙabilanci da ke barazana ga zaman lafiya a ƙasar. Masana da dama na ganin rashin cikawa da gwamnati ke yi ga alkawuran ta na kara dagula lamarin.
Iyalan mamatan sun bayyana cewa ba za su yi shiru ba har sai an tabbatar da adalci.
“Za mu ci gaba da magana har sai an yi mana adalci,” in ji Malam Bala Dutse.
MTN Ya Sanar Da Dakatar Da Tsarin Bayar Da Rancen Kati Da Data
Karo Da Tsuntsaye Ya Tilastawa Jiragen Sama Biyu Saukar Gaggawa A Abuja
Wani Mutum Ya Riga Mu Gidan Gaskiya Biyo Bayan Daɓa Masa Wuƙa Saboda Naira 200
RAHOTO: Hare-Haren Dakarun Sojin Sama Sun Hallaka Fararen Hula Sama Da 400 A Najeriya Cikin Shekara 12
Sama Da Dalibai Miliyan Biyu Ne Za Su Rubuta Jarabawar JAMB Ta Bana
Muhimmancin sada zumunci – Malam Jafar
“Azumin Sitta Shawwal: Fa’idodi, Sharudda, Da Muhimmancinsa A Musulunci”
Gwamnatin Kano Ta Sanar Da Ranakun Komawa Makaranta
Gwamnatin Tarayya Ta Fitar Da Sunan Mutum 48 Da Ake Zargi Da Ɗaukar Nauyin Ta’addanci
