Saudiyya Ta Kama Matar Da Mahaifiyar Fitaccen ’Dan Bindiga Ado Aliero

Jami’an tsaron Saudiyya sun kama wasu mata biyu da ake zargin su ne matar da kuma mahaifiyar fitaccen jagoran ’yan bindiga da ake nema ruwa a jallo a Najeriya, Ado Aliero. An kama su ne a birnin Madina yayin da suke gab da fara aikin Hajji.

Ado Aliero ya shahara wajen aikata manyan laifuka, musamman garkuwa da mutane da kai farmaki a Jihar Zamfara da yankunan da ke kewaye da ita. Hukumomi sun bayyana cewa ana zargin matan biyu da ƙoƙarin ɓoye a cikin maniyyata domin guje wa kama.

An Yanke Wani Matashi Hukuncin Kisa Kan Kashe Abokinsa Saboda Hula

Wata majiya daga kafar labarai ta ABN News ta ruwaito cewa matan sun canza sunayensu kafin tafiya, da nufin ɓoye asali da kaucewa shaiduwa daga hukumomi. Kamen nasu ya zama wani muhimmin ci gaba a cikin kokarin da gwamnatin Najeriya ke yi tare da hadin gwiwar wasu ƙasashen waje wajen dakile ayyukan ta’addanci da masu haddasa rashin tsaro.

Rahotanni sun nuna cewa an fara zurfafa bincike kan lamarin tare da haɗin gwiwar hukumomin Najeriya da na Saudiyya. Duk da cewa ba a fitar da sunayen matan a hukumance ba, majiyoyin tsaro sun ce akwai yuwuwar a samo bayanai masu muhimmanci daga gare su — waɗanda ka iya taimakawa wajen bankado wasu muhimman bayanai kan ayyukan kungiyar su Ado Aliero.

Wannan lamari na daga cikin sabbin matakan da hukumomin tsaro ke dauka wajen ceto rayuka da dawo da zaman lafiya a yankunan da suka fi fama da rikice-rikice a Najeriya.