Jami’an NDLEA Sun Damƙe Wata Tsohuwa Da Hodar Iblis Kilo 13 Da Aka Ɓoye Cikin Bawon Ayaba

Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta kama wata mata ƴar asalin Najeriya mai shekaru 67 da ke zaune a Birtaniya, bisa zargin yunƙurin fasa ƙwaurin hodar iblis mai nauyin kilogram 13 da aka ɓoye cikin bawon ayaba a Filin Jirgin Sama na Murtala Muhammed da ke Legas.

A cewar NDLEA, jami’anta sun gano miyagun ƙwayoyin ne yayin binciken da suka gudanar kan fasinjoji kafin tashin jirgi, inda aka zargi matar da ƙoƙarin safarar hodar iblis ɗin zuwa ƙasashen waje ta hanyar da za ta kauce wa binciken jami’an tsaro.

Gwamnatin Tarrayya Ta Musanta Zargin Ɓoye Kusan Triliyan 9 Don Yaƙin Neman Zaɓen Baɗi

Hukumar ta ce an yi nasarar gano ƙwayoyin ne sakamakon tsauraran matakan bincike da jami’anta ke aiwatarwa domin dakile safarar miyagun ƙwayoyi ta filayen jiragen sama na ƙasar.

NDLEA ta ƙara da cewa bincike kan lamarin na ci gaba domin gano sauran mutanen da ake zargin suna da hannu a wannan haramtacciyar sana’a, tare da tabbatar da cewa za ta ci gaba da ɗaukar matakan da suka dace wajen yaƙi da fataucin miyagun ƙwayoyi da kuma gurfanar da masu hannu a gaban ƙuliya.