Wasu Ɓata Gari Sun Hallaka Mai Sayar Da Shayi A Kano

Wani magidanci mai sana’ar sayar da shayi, Mallam Yahaya, ya mutu bayan da wasu da ake zargin ‘yan fashi ne suka caka masa wuka tare da kwace babur ɗinsa a unguwar Ƙofar Nasarawa da ke Jihar Kano.

‎Rahotanni sun ce lamarin ya faru ne a daren Litinin, 13 ga Yuli, 2026, lokacin da ake ruwan sama. An ce maharan sun bi marigayin tun daga yankin Ƙofar Nasarawa, kafin su tare shi a kusa da gidan Zoo, inda suka caka masa wuka, abin da ya yi sanadin rasuwarsa.

‎Gwamnatin Kano Ta Musanta Rahoton Alƙaluma Kan Yawan Jama’a, Masana’antu da Masallatai

‎Majiyoyi sun bayyana cewa bayan sun aikata harin, maharan sun tsere da babur mai ƙafa biyu na marigayin.

‎Lamarin ya tayar da hankalin mazauna yankin, inda suka yi kira ga jami’an tsaro da su ƙara tsaurara sintiri, musamman daga ƙarfe tara na dare zuwa wayewar gari.

‎Sun ce a baya-bayan nan wasu ɓata gari na amfani da dare wajen tare matafiya da kwace musu babura da sauran kayayyaki masu daraja, lamarin da ke haddasa asarar rayuka da dukiyoyi.

‎Har zuwa lokacin haɗa wannan rahoto, hukumomin tsaro ba su fitar da wata sanarwa a hukumance kan lamarin ba.

DALA FM