Mutum Biyar Sun Mutu Yayin Da Tankar Mai Ta Murƙushe  Wata Motar Haya 

Aƙalla mutum biyar ne suka mutu bayan wata tankar dakon dizal ta yi hatsari, ta faɗa kan wata motar haya ƙirar Nissan Micra a birnin Ibadan, babban birnin Jihar Oyo.

Hatsarin ya faru ne da misalin ƙarfe 10 na safiyar Asabar a tashar mota ta Aduloju, da ke kan hanyar Iwo Road zuwa Ojoo, a gaban cocin Dominion City.

Dakarun Soji Sun Ceto Wanda Aka Yi Garkuwa Da Shi, Sun Kwato Naira Miliyan 10 A Kano

Babban Manajan Hukumar Kula da Zirga-zirgar Ababen Hawa ta Jihar Oyo (OYRTMA), Adeoye Ayoade, ne ya tabbatar da faruwar hatsarin, inda ya ce tankar dizal ɗin ta samu matsalar birki kafin ta faɗa kan motar haya.

A cewarsa, mutum biyar da ke cikin motar haya, maza biyu da mata uku, duk sun mutu sakamakon mummunan hatsarin.

Haka kuma, kakakin rundunar ’yan sandan Jihar Oyo, Olayinka Ayanlade, ya tabbatar da faruwar lamarin a yankin Kajorepo.

Ayanlade ya ce kwamishinan ’yan sandan jihar, Abimbola Ayodeji Olugbenga, ya bayar da umarnin tura jami’an tsaro zuwa wurin domin tabbatar da tsaro da kuma taimakawa wajen aikin ceto waɗanda hatsarin ya rutsa da su.

Lamarin ya sake jaddada buƙatar ɗaukar matakan kare lafiyar jama’a a kan tituna, musamman wajen tabbatar da ingancin motocin dakon man fetur da sauran manyan ababen hawa.

PUNCH