Mutane Biyu Sun Rasa Rayukansu Bayan Wani Rikici Kan Sayen Garin Kwaki Da Ruwan Leda A Katsina ‎

Mutane biyu sun rasa rayukansu a ƙauyen Kokami da ke ƙaramar hukumar Danja a jihar Katsina State, bayan wani rikici kan sayen garin kwaki da ruwan leda ya rikide zuwa tashin hankali mai muni.

‎Lamarin ya auku ne a ranar 4 ga Afrilu, inda rikicin ya ɓarke tsakanin Ibrahim Auwal da wani ɗan kasuwa mai suna Joe, wanda aka fi sani da K.C. Jones.

‎WAI ME GARO YA YI NE? 

‎Rahotanni sun ce rikicin ya fara ne a shagonsa lokacin da suka samu sabani kan ciniki, lamarin da ya kai ga rikici mai tsanani. Ana zargin cewa Jones ya caka wa Auwal wuka a lokacin faɗan.

‎An garzaya da Auwal zuwa asibitin Abdullahi Makama Hospital domin ceton rayuwarsa, sai dai daga bisani aka tabbatar da mutuwarsa.

‎Matasa sun ɗauki fansa

‎Mutuwar Auwal ta haddasa ɓacin rai a cikin al’umma, inda wasu matasa suka taru domin ɗaukar fansa. Rahotanni sun nuna cewa sun kai wa Jones hari, suka kashe shi tare da ƙone gawarsa a wani babban titi da ke kusa da wurin.

‎‘Yan sanda sun yi kame

‎Rundunar ‘yan sandan jihar Katsina  ta tabbatar da kama mutane huɗu da ake zargi da hannu a kisan gillar.

‎Mai magana da yawun rundunar, Abubakar Aliyu, ya ce jami’an tsaro sun gaggauta isa wurin domin daƙile tashin hankalin tare da dawo da zaman lafiya.

‎Ya ce, “Mutanen da ake zargi suna hannun hukuma, kuma ana ci gaba da bincike.”

‎Kwamishinan ‘yan sanda na jihar, Ali Fage, ya yi Allah wadai da abin da ya faru, tare da kira ga al’umma da su riƙa kai ƙorafe-ƙorafensu ga hukumomin tsaro maimakon ɗaukar doka a hannunsu.

‎Gwamnati ta yi Allah wadai

‎Gwamnatin jihar Katsina ta bayyana lamarin a matsayin abin takaici kuma wanda ba za a amince da shi ba.

‎Kwamishinan harkokin tsaro na cikin gida, Nasir Mu’azu, ya ce rikicin ya samo asali ne daga sabani na kashin kai, ba wai rikicin addini ko na ƙabila ba.

‎Ya ce, “Babu wanda ke da ikon ɗaukar doka a hannunsa. Duk wanda aka samu da hannu za a hukunta shi.”

‎Ya kuma ƙara da cewa an tura jami’an tsaro yankin, inda ake gudanar da sintiri domin tabbatar da zaman lafiya.

‎Gwamnan jihar, Dikko Umaru Radda, ya miƙa ta’aziyyarsa ga iyalan waɗanda suka rasu, tare da kira ga shugabannin al’umma da su ƙara ƙaimi wajen tabbatar da zaman lafiya da hana aukuwar irin wannan lamari a nan gaba.

PREMIUM TIMES