Wata Motar Jigilar Fasinja Mai Amfani Da CNG Ta fashe A Kaduna 

Advertisements

Wata motar jigilar fasinja mai amfani da iskar gas ta CNG ta fashe a safiyar Lahadi a tashar motoci ta Mando da ke birnin Kaduna, kamar yadda rahotanni suka tabbatar.

Motar, wadda aka fi sani da “Luxurious Bus”, mallakin wani kamfanin sufuri mai suna Silver, dake gudanar da zirga-zirga tsakanin Kudancin da Arewacin Najeriya.

Radio Kano ta ruwaito cewa fashewar ta faru ne da misalin asubahin ranar, a lokacin da babu fasinjoji ko ma’aikata a cikin motar.

Ko da yake babu asarar rai ko samun raunuka, fashewar ta haddasa asarar dukiya, inda wasu ƙananan motoci da ke kusa da wurin suka lalace sakamakon ƙarfin fashewar.

Har yanzu ba a bayyana musabbabin fashewar ba, yayin da ake sa ran hukumomi za su fara bincike domin gano dalilin faruwar lamarin.

Lamarin na zuwa ne a daidai lokacin da ake ci gaba da ƙara amfani da motocin da ke amfani da iskar gas ta CNG a Najeriya, matakin da ke janyo muhawara kan batutuwan tsaro da kulawa da irin waɗannan motoci.