Gwamnonin Najeriya Sun Nemi Karin Karfin Iko A Tsarin Samar Da Yan Sandan Jihohi

Gwamnonin jihohin Najeriya sun nemi a yi wa kundin tsarin mulkin ƙasar gyara domin ba su ƙarin iko wajen jagoranci da daidaita harkokin tsaro a jihohinsu, a wani ɓangare na yunkurin kafa rundunar ’yan sandan jihohi.

Buƙatar ta fito ne a yayin wani taro na musamman da Sakatariyar Ƙungiyar Gwamnonin Najeriya (NGF) ta shirya a Abuja, inda manyan lauyoyin gwamnati, masana harkokin shari’a da jami’an tsaro suka tattauna kan hanyoyin da za a bi wajen kafa rundunar ’yan sandan jihohi cikin inganci da bin doka.

Iran Ta Ayyana Hutun Kwanaki Uku A Tehran Domin Jana’izar Ali Khamenei

Rahoton taron ya nuna cewa mahalarta sun mayar da hankali kan muhimman batutuwa da suka haɗa da tsarin doka, hanyoyin samar da kuɗaɗen gudanarwa, tsarin ɗaukar jami’ai da kuma yadda za a tabbatar da haɗin kai tsakanin gwamnatocin jihohi da gwamnatin tarayya wajen gudanar da ayyukan rundunar.

Sun kuma jaddada buƙatar samar da ingantattun matakan sa ido da tantance aiki domin tabbatar da cewa rundunar za ta gudanar da ayyukanta cikin gaskiya, adalci da bin ƙa’idojin aiki.

A cewar mahalarta taron, kafa ’yan sandan jihohi na daga cikin hanyoyin da za su taimaka wajen ƙarfafa tsaro da bai wa jihohi damar fuskantar matsalolin tsaro da suka shafe su kai tsaye.

Ana sa ran sakamakon shawarwarin da aka cimma a taron zai taimaka wajen tsara dokokin da za a gabatar wa Majalisar Tarayya domin duba yiwuwar aiwatar da tsarin ’yan sandan jihohi a faɗin Najeriya.

PUNCH