An hada Liverpool da Real Madrid a Champions League

DAGA KABIRU BASIRU FULATAN 

Liverpool da Real Madrid za su kara a wasan zagaye na biyu a Champions League, bayan da aka raba jadawali ranar Litinin a Nyon, Switzerland.

A bara a Faransa Real Madrid ta doke Liverpool ta lashe kofin, kuma na 14 jumulla.

Kungiyoyin biyu sun kara sau tara a tsakaninsu a gasar Zakarun Turai, inda Real ta ci biyar, Liverpool ta yi nasara a uku da canjaras daya.

Real Madrid ce ta ja ragamar rukuni na shida da maki 13, Liverpool kuwa ita ce ta yi ta biyu a rukunin farko da maki 15 iri daya da na Liverpool.

Real Madrid ce za ta fara kai ziyara Anfield a wasan farko na zagaye na biyu ranar 14 ko 15 ko 21 ko 22 ga watan Fabrairu.

Za kuma ta karbi bakuncin Liverpool a zagaye na biyu a Santiago Bernabéu ranar 7 ko 8 ko 14 ko 15 ga watan Maris.

Real Madrid tana da Champions League 14, ita kuwa Liverpool tana da guda shida, kenan a tasakaninsu an dauki kofin sau 20 kenan.

Jadawalin wasannin zagaye na biyu:

RB Leipzig v Manchester City

Club Bruges v Benfica

Liverpool v Real Madrid

AC Milan v Tottenham

Eintracht Frankfurt v Napoli

Borussia Dortmund v Chelsea

Inter Milan v Porto

PSG v Bayern Munich

Tun farko an raba kungiyoyi 16 zuwa tukunya biyu, ta farko wadda ta kunshi wadanda suka ja ragamar rukuninsu, sai tukunya ta biyu ta wadanda suka yi na bibiyu a rukunin.

Wadanda suka yi na bibiyu a rukuninsu sun hada da Liverpool da Brugge da Inter da Eintracht Frankfurt da Milan da Leipzig da Dortmund da kuma PSG.

Jerin wadanda suka yi na daya a kowanne rukuni: Bayern, Benfica, Chelsea, Manchester City, Napoli, Porto, Real Madrid da kuma Tottenham.