DSP Barau Jibrin: Shekaru Biyu Na Gwagwarmayar Gina Kasa Da Kare Muradun Jama’a

Sanata Barau I. Jibrin, wanda ke wakiltar Kano ta Arewa a Majalisar Dattawa ta 10, kuma ke matsayin Mataimakin Shugaban Majalisar Dattawa (DSP), ya cika shekaru biyu yana aiki a wannan matsayi — wanda ya shahara da daukar nauyin muhimman dokoki da suka shafi cigaban kasa gaba daya.

A cewar Hukumar Zabe ta Kasa (INEC), Sanata Barau ya shiga majalisar ne domin wakiltar mazabarsa, amma ayyukansa sun zarce inda ya fito, har suna tabo kowane yanki na kasar nan.

Yadda Tinubu Da Barau Suka Taimaka Wajen Kafa Rundunar Tsaron Daji A Najeriya

Dokoki da suka nuna kishin kasa

Tun lokacin da aka zabe shi, Barau ya nuna cewa Najeriya ce a gabansa, ba kawai Kano ba. Ga wasu daga cikin dokokin da ya dauki nauyinsu:

Dokar Kafa Kwalejin Kimiyya da Fasaha ta Tarayya, Kabo (2023): An kafa wannan makaranta ne domin bunkasa ilimin fasaha a Kano ta Arewa.

Dokar Kafa Hukumar Ci Gaban Arewa maso Yamma (2024): Wannan hukuma za ta taimaka wajen warware matsalolin cigaba da yankin ke fuskanta.

Dokar Tabbatar da Ci gaba da Ayyukan Gwamnati (2023): An samar da dokar ne domin hana barin ayyukan da gwamnati ta fara a kasa a wulakance su.

Dokar Hana Laifukan Yanar Gizo (Cybercrime Bill) (2023): Domin kara kare kasar daga barazanar yanar gizo da kuma bunkasa tsaro a intanet.

Dokar Kafa Jami’ar Harkokin Ruwa a Oron (2017): Wannan na daga cikin matakan karfafa harkokin sufuri da tattalin arziki ta ruwa.

Dokar Kafa Kwalejin Fasaha a Aghoro, Bayelsa (2019): Don tallafa wa koyarwar fasaha a yankin kudu maso kudu.

Dokar Kafa Kwalejin Ma’adinai da Nazarin Duniya a Guyuk (2019): Wani bangare ne na taimakawa gwamnati wajen bunkasa hakar ma’adinai a kasar.

Dokar Gyara Dokar Kwalejojin Ilimi na Tarayya (2019): Domin inganta yadda ake tafiyar da kwalejojin ilimi a fadin Najeriya.

Gyaran Dokar JAMB (2019): Domin tabbatar da gaskiya da adalci a tsarin shigar dalibai jami’o’i.

Dokar Kafa Jami’ar Nazarin Harkokin Ruwa a Ogbaru, Anambra (2019): An samar da wannan jami’a domin karfafa ilimin ruwa a kudu maso gabas.

Dokar Kafa Jami’ar Tarayya a Uga, Anambra (2019): Don saukaka samun ilimi a yankunan karkara.

Fiye da dokoki 21 cikin shekara biyu

Sanata Barau ya kafa tarihi a shekarar 2024 a matsayin dan majalisa mafi yawan dokoki da ya dauki nauyinsu – sama da guda 21. Wannan na nuna cewa tun kafin zaben sa, yana da shiri tsaf.

Jagora mara nuna bangare

Ayyukansa sun nuna cewa shi mutum ne mai kishin kasa da tunani mai zurfi. Hakan ya taimaka wajen zabar sa a matsayin Mataimakin Kakakin Majalisar ECOWAS, wanda ke da alhakin kula da dimokuradiyya da zaman lafiya a nahiyar Yammacin Afirka.

Shekaru biyu da DSP Barau ya shafe a majalisa sun kasance masu albarka ga kasa. Daga tsarin ilimi, fasaha, tsaro, har zuwa ci gaban yankuna daban-daban — Sanatan ya taka rawa mai girma. Hakan ya sa wasu ke ganin yana da makoma mai haske a gaba a siyasar Najeriya.

Anwar ya aiko daga Kano. Za a iya tuntubar sa ta: fatimanbaba1@gmail.com

24 ga Mayu, 2025