News
Jami’an Hukumar NDLEA Sun Kama Miyagun Ƙwayoyi Cikin Ledar Ganyen Shayi A Filin Jirgin Sama
Jami’an Hukumar Yaƙi da Sha da Fataucin Miyagun ƙwayoyi ta ƙasa (NDLEA) sun kama wasu buhuna 66 na kwayar Cannibas, wani nau’in tabar wiwi mai haɗari, wanda aka ɓoye a matsayin ganyen shayi.
Jami’an NDLEA sun kama su ne a rumfar shigo da kaya ta filin jirgin Murtala Muhammed da ke Ikeja a Legas.
Wata sanarwa da daraktan yaɗa labarai da bayar da shawarwari na hukumar Femi Babafemi ya sanya wa hannu, ta ce an kama wadanda ake zargi ne a ranar 5 ga watan Yunin 2025 bisa sahihan bayanan sirri da aka samu gabanin isar da kayan a sashin dakon kaya na filin jirgin a ranar 11 ga Mayu, 2025.
Sanarwar ta bayyana cewa, hukumar ta NDLEA ta sa ido kan jigilar kayayyaki, kuma ta ci gaba da sa ido a kai sama da makonni uku kafin ta gayyaci sauran masu ruwa da tsaki don gudanar da aikin hadin gwiwa a ranar Alhamis ɗin da ta gabata, inda ta gano cewa an ɓoye kwayar da nauyinta ta kai kilogiram 62.20 a matsayin ganyen shayin da ya fito daga ƙasar Thailand ta ƙasar Hadaddiyar Daular Larabawa a cikin jirgin Emirate Airlines.
“Kwancewar da aka yi a ranar Alhamis 5 ga watan Yuni 2025 ya samo asali ne daga sahihan bayanan sirri da aka samu gabanin isowar jigilar kaya a sashin dakon kaya na filin jirgin a ranar 11 ga Mayu.
“Hukumar NDLEA ta sanya ido kan jigilar kayayyaki, kuma ta ci gaba da sa ido a kai sama da makonni uku kafin ta gayyaci sauran masu ruwa da tsaki don jarrabawar haɗin gwiwa a ranar Alhamis ɗin da ta gabata.”
An ɓoye kaya mai nauyi mai nauyin kilogiram 62.20 a cikin ledar koren shayi da ya fito daga ƙasar Thailand ta kasar UAE a cikin jirgin Emirate Airlines.
Sanarwar ta ƙara da cewa, a wani samame da jami’an NDLEA suka yi a Legas a ranar biyu ga watan Yuni, sun kama wani nau’in skunk mai nauyin kilogiram 1,665, wani nau’in tabar wiwi a kan titin Lekki zuwa Ajah tare da kama wasu mutane biyu, Gidado Abdulrasaƙ Ayinde da Obanla Oluwafemi.