Kai Hari Kan ’Yan Jarida , Hari Ne Kan Dimokuraɗiyya — Abbas Ibrahim

Daga Abbas Ibrahim

Wani hari da aka kai kan wasu ’yan jarida a Kano yayin da suke dawowa daga wani taron jam’iyyar APC ya sake haifar da damuwa kan tsaron ma’aikatan kafafen yaɗa labarai a lokacin harkokin siyasa.

Lamarin ya faru ne a ranar 5 ga Satumba 2026, bayan wasu ’yan jarida sun kammala ɗaukar rahoton wani taron siyasa da aka gudanar a filin wasa na Sani Abacha da ke Kano.

Gwamnatin Kano Za Ta Tallafa Wa Duk Wani Yunkurin Da Zai Kawar Da Ta’ammali Da Miyagun Ƙwayoyi

Rahotanni sun ce wasu da ake zargin ’yan daba ne sun far wa motar Radio Nigeria Pyramid FM da ke ɗauke da ’yan jaridar. An ce maharan sun yi amfani da adda da wukake wajen far wa motar, inda suka farfasa gilasan motar tare da raunata direban. Wasu daga cikin ’yan jaridar ma sun samu raunuka sakamakon fashewar gilashi.

Abbas Ibrahim ya ce kai hari kan ’yan jarida ba wai kai hari kan mutum ɗaya ba ne kawai, illa kai hari ne kan haƙƙin jama’a na samun bayanai.

Ya ce idan ’yan jarida suka fara jin tsoron zuwa wuraren tarukan siyasa, zanga-zanga ko kamfen saboda fargabar kai musu hari, hakan na iya haifar da gibi wajen samun sahihan bayanai, lamarin da zai iya bai wa jita-jita da bayanan da ba a tabbatar da su ba damar yaɗuwa.

A cewarsa, wannan na iya yin illa ga dimokuraɗiyya, saboda ’yan ƙasa na buƙatar sahihan bayanai domin su fahimci abubuwan da ke faruwa tare da yanke shawara yadda ya kamata.

Wannan ba shi ne karo na farko da ake kai wa ’yan jarida hari a yayin gudanar da ayyukansu ba. A lokacin zanga-zangar #EndBadGovernance ta ranar 1 ga Agusta 2024, an kuma kai hari kan motar Channels Television da ke ɗauke da ’yan jarida, inda wasu daga cikinsu suka samu raunuka.

Abbas Ibrahim ya yi kira ga hukumomin tsaro da su ƙara ɗaukar matakan kare ’yan jarida, musamman yayin tarukan siyasa da sauran manyan abubuwan da jama’a ke taruwa.

Ya kuma ce bai kamata hukumomi su tsaya kawai wajen yin Allah-wadai da hare-haren bayan sun faru ba, sai dai su tabbatar da cewa an gudanar da cikakken bincike tare da gurfanar da duk wanda aka samu da hannu wajen kai hari kan ’yan jarida.

Ya ce jam’iyyun siyasa da hukumomin tsaro suna da muhimmiyar rawa wajen tabbatar da cewa ba a shigar da makamai cikin tarukan siyasa, tare da samar da isasshen tsaro ga mahalarta taro da ’yan jaridan da ke gudanar da aikinsu.

Yayin da Najeriya ke tunkarar zaɓen 2027, Abbas Ibrahim ya ce gwamnati, hukumomin tsaro, jam’iyyun siyasa, ƙungiyoyin ’yan jarida da ƙungiyoyin fararen hula ya kamata su haɗa kai wajen tabbatar da tsaron ma’aikatan kafafen yaɗa labarai.

A cewarsa, kare ’yan jarida na daga cikin hanyoyin kare ’yancin faɗar albarkacin baki, haƙƙin jama’a na samun bayanai da kuma dimokuraɗiyya.