AMATA Ta Yi Wa Abba Kabir Yusuf Fatan Nasara, Ta Tabbatar da Goyon Bayanta Ga Gwamnatinsa

Ƙungiyar Nigerian Amalgamated Traders/Artisans Welfare Development Association (AMATA) ta bayyana goyon bayanta ga Gwamnatin Jihar Kano ƙarƙashin jagorancin Gwamna Abba Kabir Yusuf, tare da yi mata fatan samun nasara wajen aiwatar da manufofinta na ci gaban jihar.

Ƙungiyar ta bayyana hakan ne yayin wata ganawa da Kwamishinan Yaɗa Labarai da Harkokin Cikin Gida na Jihar Kano, Hon. Abdullahi Ibrahim Waiya, inda aka tattauna batutuwan da suka shafi kasuwanci, walwalar ’yan kasuwa da masu sana’o’i, da kuma ci gaban al’umma.

Mutum Biyar Sun Mutu Yayin Da Tankar Mai Ta Murƙushe  Wata Motar Haya 

Taron ya kuma mayar da hankali kan hanyoyin ƙarfafa alaƙa tsakanin ƙungiyar da gwamnati, musamman wajen bunƙasa harkokin kasuwanci da inganta rayuwar ’yan kasuwa da masu sana’o’i.

A yayin tattaunawar, an jaddada muhimmancin haɗin kai tsakanin gwamnati da ƙungiyoyin ’yan kasuwa wajen bunƙasa tattalin arziki, tabbatar da zaman lafiya da samar da yanayin da zai ba harkokin kasuwanci damar haɓaka.

Haka kuma, an yi tsokaci kan rawar da ’yan kasuwa da matasa za su taka wajen ci gaban jihar, tare da buƙatar ci gaba da tattaunawa domin magance matsalolin da suka shafi al’umma.

Kwamishinan Yaɗa Labarai, Hon. Abdullahi Ibrahim Waiya, ya yaba da yunƙurin ƙungiyar na ƙarfafa dangantaka da gwamnati, inda aka jaddada muhimmancin haɗin gwiwa wajen cimma muradun ci gaba.

AMATA ta kuma yi fatan Gwamna Abba Kabir Yusuf da gwamnatinsa za su samu nasarar aiwatar da shirye-shiryen da za su inganta harkokin kasuwanci da walwalar al’ummar Jihar Kano.