Labarai
Ya Kashe Mahaifinsa Saboda Yi Wa Mahaifiyarsa Kishiya

DAGA YASIR SANI ABDULLAH
Wani matashi mai suna Kazeem Muhammad ya tsere bayan kashe mahaifinsa saboda yi wa mahaifiyarsa kishiya shekara daya da ta gabata a garin Suleja da ke jihar Neja.
Dan uwan marigayin mai suna Isah ya shaida wa Aminiya cewa bayan ya kwada wa mahifin nasa falanki a ka, take Kazeem ya cika wandonsa da iska.
Ya ce, “Matashin na shaye-shaye sosai, don haka ya saba aikata abubuwan da ba su kamata ba.
“Ranar Laraba da safe ne sa-in-sa ta shiga tsakaninsa da mahifin nasa, sai ya kwada masa wani falankin katako da ke gurin, kuma take ya fadi, shi kuma ganin haka sai ya tsere.
“Mun kai shi asibiti domin ba shi agajin gaggawa, amma a nan take ya ce ga garinku nan,” inji dan uwan marigayin.
Ya kuma ce tuni suka sanar da hukumomin da suka kamata domin daukar mataki, sannan suka binne gawar mamacin.
Sai dai Rundunar ’Yan Sandan yankin ta ki cewa uffan a kan lamarin.
-
Labarai6 days ago
Gwamnatin Tarayya Za Ta Fara Yi Wa Masu Digirin Ƙasashen Waje Jarrabawa
-
Labarai2 days ago
Jami’an Tsaro A Pakistan Sun Kama ’Yan Najeriya 20 Kan Zargin Safarar Miyagun Ƙwayoyi
-
Labarai1 day ago
Hare-haren Ta’addanci Ya Yi Sanadiyyar Mutuwar Mutum 835 A Najeriya Cikin Wata Guda – Rahoto
