Gwamna Abba Kabir Yusuf Ya Taya Dangambo Murnar Zama Shugaban Online Media Chapel

Gwamnan Jihar Kano, Alhaji Abba Kabir Yusuf, ya taya Abubakar Abdulkadir Dangambo murna bisa nada shi a matsayin Shugaban sabon Online Media Chapel na Kungiyar ‘Yan Jarida ta Najeriya (NUJ), reshen jihar Kano.

A cikin wata sanarwa da mai magana da yawun gwamnan, Sunusi Bature Dawakin Tofa, ya fitar a ranar Litinin, Gwamna Yusuf ya bayyana nasarar Dangambo a matsayin wani muhimmin mataki na ci gaba da bunkasa aikin jarida da bin ka’idojin aiki a kafafen yada labarai na zamani.

Gwamnatin Tarayya Ta Umurci WAEC da NECO Su Koma Gudanar da Jarabawa ta Kwamfuta 

Gwamna Yusuf ya jaddada cewa kafa wannan sabon reshe na kafafen yada labarai ta yanar gizo, karkashin jagorancin Comrade Sulaiman Dederi na NUJ Kano, zai taka rawa wajen tallafa wa kafafen yada labarai na gargajiya, musamman wajen tabbatar da gaskiya da adalci a rahotanni.

Ya bayyana kwarin gwiwarsa cewa karkashin jagorancin Dangambo, sabon reshen zai kasance ginshiki wajen samar da sahihan labarai da bunkasa aikin jarida a jihar Kano da ma kasa baki daya.

Gwamnan ya kuma yi alkawarin cewa gwamnatinsa za ta ci gaba da goyon bayan duk wani kokari da zai inganta harkar yada labarai da kuma karfafa hadin kan ‘yan jarida domin ci gaban jihar.

A karshe, Gwamna Yusuf ya yi fatan alheri ga Dangambo da sauran mambobin kwamitinsa, yana mai bukatar su gudanar da aikinsu cikin gaskiya, kwarewa da kishin kasa.