Kyautar N200,000 Ga Dalibar Da Ta Lashe Gasar Duniya Ta Fallasa Darajar Ilimi A Najeriya

DAGA LAMARA GARBA AZARE

Hankula  sun karkata gaba daya a kafafen sada zumunta akan gwamnatin tarayya ta bai wa Nafisa Abdullahi, yarinya ‘yar shekara 17 daga jihar Yobe, kyautar naira 200,000 kacal, duk da cewa ta lashe gagarumar gasar TeenEagle Global English Championship da aka gudanar a birnin London na Birtaniya.

Nafisa ta samu wannan lambar yabo ne a ranar 28 ga watan Agusta, 2025, inda ta wakilci Najeriya cikin daraja a matakin duniya. Duk da haka, sanarwar gwamnatin kan wannan kyauta ta zama abin cece-kuce, inda mutane da dama ke ganin hakan ya nuna ƙarancin darajar da ake bai wa ilimi a ƙasar.

Jami’an ’Yan Sanda Sun Cafke Mutum Biyu Da Ake Zargi Da Sata, Sun Kwato Wayoyi 23, Na’urorin POS A Kano 

A cewar wasu masu sharhi, kuɗin da aka bai wa Nafisa bai kai kuɗin jigilar ta daga Damaturu zuwa Abuja ba, balle masauki da sauran kuɗaɗen tafiya. Wannan ya haddasa tambayoyi kan yadda gwamnati ke fifita nasarorin wasanni fiye da na ilimi.

A makonni kafin wannan, gwamnati ta bai wa ‘yan wasa da suka yi fice a gasar duniya kyautar dala $100,000 kowanne — wanda ya kai kusan naira miliyan 160 a kudin Najeriya. Wannan bambanci ya zafafa tattaunawa kan yadda gwamnati ke zuba jari kan wasanni yayin da ilimi ke ta fama da matsaloli.

Wani uba ya wallafa a shafin sada zumunta cewa: “’Yata ta tambaye ni, Daddy, shin ya fi kyau a zama ɗan kwallo fiye da mai Ilimi? Na kasa ba ta amsa.”

Masana sun bayyana cewa irin wannan matsayi na gwamnati kan iya rage ƙwazo ga yara masu hazaka, musamman idan suka fahimci cewa nasarar ilimi ba ta samun kulawa kamar wasanni.

A wasu ƙasashe, irin nasarar Nafisa ana kallonta a matsayin damar ɗaukaka ƙasa. A Pakistan, Malala Yousafzai ta samu tallafi har ta kai ga lashe kyautar Nobel. A India, gwamnati na bai wa matasa masu hazaka tallafin karatu da kulawa, haka ma a Rwanda, inda gwamnati ke zuba jari sosai a fannin ilimi da basirar matasa.

Masana a Najeriya na cewa wannan lamari ya sake bayyana matsalar tsarin ilimi da fifikon gwamnati kan wasu fannoni fiye da ilimi. Duk da haka, sun ce nasarar Nafisa hujja ce ta cewa matasa na Najeriya na iya yin fice a matakin duniya idan aka samar musu da damar da ta dace.

“Abin da ya faru bai rage darajar nasarar Nafisa ba,” in ji wani malamin makaranta. “Sai dai ya zama darasi ga gwamnati cewa ba za a samu ci gaba mai ɗorewa ba muddin ba ta mayar da hankali kan ilimi.”

A ƙarshe, cece-kucen da ya biyo bayan wannan kyauta na N200,000 ya sake jefa tambaya mai zurfi kan yadda Najeriya ke kallon darajar ilimi da nasarorin matasa.