Mun Samu Sunayen Fiye Da Dilolin Kwaya 2,000 A Kano —Rundunar ‘Yan Sanda

Advertisements

Rundunar ‘yan sandan Jihar Kano ta ce ta tattara sunayen fiye da mutum 2,000 da ake zargi da safarar miyagun ƙwayoyi a sassa daban-daban na jihar.

Kwamishinan ‘yan sandan jihar, Ibrahim Adamu Bakori, ne ya bayyana hakan a ranar Talata yayin wani taron manema labarai da ya yi kan halin tsaro a watanni ukun farkon shekarar 2026.

Gwamnatin Tarayya Ta Karɓi ‘Yan Nijeriya 708 Da Suka Maƙale A Jamhuriyar Nijar

Ya ce rundunar ta cimma wannan nasara ne ta hanyar inganta tattara bayanan sirri da kuma haɗin kai da al’umma, wanda ya ba su damar gano masu hannu a safarar miyagun ƙwayoyi.

“Mun samu sunayen fiye da mutum 2,000 da ake zargi da safarar miyagun ƙwayoyi, kuma ana ci gaba da tantance su domin ɗaukar matakin da ya dace,” in ji shi.

Raguwar laifuka

Bakori ya kuma ce an samu raguwar aikata laifuka a Kano a cikin watanni ukun farkon shekarar nan, yana mai danganta hakan da sabbin dabarun tsaro da rundunar ta bullo da su.

A cewarsa, matakan sun haɗa da kai samame na musamman da kuma amfani da fasaha wajen bin diddigin masu aikata laifuka.

Kwamishinan ya ce wani shiri na musamman mai suna Operation Kukan Kura ya taimaka wajen rage ayyukan daba da fashin waya a jihar.

Sai dai shirin ya janyo muhawara daga wasu masu sa ido kan harkokin tsaro, inda suke zargin ana wuce gona da iri a wasu lokuta. Duk da haka, rundunar ta ce shirin ya taimaka wajen rage laifuka.

Rundunar ta kuma ce ta daƙile yunƙurin kutsen ‘yan bindiga cikin jihar tare da haɗin gwiwar sauran jami’an tsaro.

Haka kuma, ta ce an samu ci gaba wajen rage rikice-rikicen manoma da makiyaya ta hanyar tattaunawa da sasanta bangarorin da abin ya shafa.

Bugu da ƙari, rundunar ta kama mutane da dama da ake zargi da aikata laifuka daban-daban, ciki har da fashi da makami, garkuwa da mutane, safarar miyagun ƙwayoyi da kuma laifukan intanet.

Bakori ya jaddada muhimmancin haɗin kai tsakanin al’umma da jami’an tsaro wajen tabbatar da zaman lafiya.

Ya kuma yaba wa gwamnan Jihar Kano, Abba Kabir Yusuf, bisa goyon bayan da yake bai wa rundunar.

Sai dai ya amince cewa har yanzu akwai ƙalubalen tsaro da ke buƙatar ƙarin ƙoƙari, yana mai kira ga al’umma da su ci gaba da bai wa jami’an tsaro haɗin kai domin tabbatar da tsaro mai ɗorewa a jihar.